बाँके पुस २३ गते ।
जिल्ला ट्राफिक कार्यालय बाँकेले सवारी दुर्घटना न्यूनिकरणका लागि प्रभावकारी अभियान चाल्ने जनाएको छ ।
ट्राफिक प्रमुखको कार्यभार सम्हालेको करिव दुई हप्तापछि आज पत्रकारहरुसँगको परिचयात्मक कार्यक्रममा ट्राफिक प्रहरी निरीक्षक हिमालय शाहले दुर्घटना न्यूनिकरणका लागि मापासे चेकिङलाई कडाईका साथ कार्यान्वयनमा लैजाने प्रतिबद्धता जनाउनुभयो ।
उहाँले अटो रिक्सा, ई रिक्सा व्यवस्थापनका लागि नेपालगन्ज उपमहानगरपालिकासँग् समन्वय गरेर ई रिक्सा दर्ताको काम भइरहेको पनि जानकारी दिनुभयो ।
नेपालगन्ज र कोहलपुर क्षेत्रमा मालबहाक सवारी साधान तोकिएको समयमा लोड अनलोड गर्ने व्यवस्था मिलाउन पहल गरिने पनि उहाँको भनाइ छ । अनटेष्ट र नम्वर प्लेट स्पष्ट नभएका सवारी साधानहरुमा नम्वर प्लेट बनाउन लगाउने कार्यलाई पनि कडाइ गरिने उहाँको भनाइ छ ।
उहाँले भएको जनशक्ति र स्रोतसाधनको उपयोग गरेर दुर्घटना न्यूनिकरणको प्रयास गरिने उल्लेख गर्नुभयो । कार्यक्रममा चालू आर्थिक वर्षको प्रगति प्रतिवेदन पनि पेश गरिएको छ ।
त्यसक्रममा पाँच महिनाको अवधिमा ९२ लाख २१ हजार राजश्व संकलन भएको छ । त्यसक्रममा ट्राफिक नियम उल्लंघन गर्ने १६ हजार ८ सय ५ सवारी साधान कारवाहीमा परेका छन् ।
Discussion about this post