बाँके चैत २१ गते ।
नेपालबाट अवैध रुपमा हुने निकासी र भारतबाट हुने अवैध पैठारीलाई नियन्त्रण गर्ने जिम्मेवारी सरकारले सशस्त्र प्रहरीलाई दिएको छ । नेपाल–भारत सीमामा सशस्त्र प्रहरी बलको विओपी राखिएको छ । अवैध चोरी पैठारी नियन्त्रणका लागि सरकारले ठूलो जत्थासहितको सशस्त प्रहरी राखेको पनि छ ।
सशस्त्र प्रहरीको चार घेरा भित्र नेपालगन्ज भन्सार कार्यालय छ । जमुनाहा सीमा क्षेत्र नजिकै रहेको नेपालगन्ज भन्सार कार्यालय वरिपरी सुरक्षाका लागि अग्लो पर्खाल पनि लगाइएको छ । भन्सार कार्यालयको वरिपरी सशस्त्र प्रहरीले २४ सै घण्टा सुरक्षा दिन्छ । त्यति मात्र नभई भन्सारको सुरक्षाका लागि पर्खालको चारै कुनामा अग्ला टावर राखिएको छ । त्यहिँ टावरमा हतियारसहित सशस्त्र प्रहरीले ड्युटी गर्छन् ।
तर, सशस्त्र प्रहरीको जिम्मामा रहेको नेपालगन्ज भन्सार कार्यालयको कम्पाउण्ड भित्र राखिएका सामान चोरी भइरहेको छ । सशस्त्र प्रहरीले नियन्त्रणमा लिई लिलामीका लागि राखिएका सामान त्यहाँबाट गायव हुने गरेको छ । लिलामीका लागि राखिएका सामान भन्सारको चार दिवालभित्र रहेका सशस्त्र प्रहरीले चोरी गरि विक्रि गरेको खुलेको छ ।
सर्वसाधारणबाट खोसेको चिसो पेय पदार्थ ड्यू भन्सार विओपीमा कार्यरत सशस्त्र प्रहरीका जवानले भन्सार कार्यालय नजिकैको एक पसलमा विक्रि गरिरहेको फेला परेपछि लिलामीका लागि भन्सार कार्यालयमा राखेको सामान सशस्त्र प्रहरीले चोरी गर्दै आएको खुलासा भएको हो ।
सर्वसाधारणबाट नियन्त्रणमा लिएको तीन पेटी ड्यू सशस्त्र प्रहरीका जवानले पसलमा विक्रि गरिरहेको फेला पारेपछि स्थानीयले केरकार पार्न खोज्दा उनी भागेको एक पीडितले बताए ।
विक्रि गर्दै गर्दा फेला पारेपछि नियन्त्रणमा लिन खोज्दा सशस्त्र प्रहरीका जवान पर्खालबाट हाम फालेर आफ्नो कार्यालयमा गएको ति पीडितको भनाई छ । ‘हामीबाट खोसेर भन्सार कार्यालयमा लगेको ड्यू सशस्त्र प्रहरीका एक जवानले विक्रिका लागि पसलमा ल्याएको फेला पार्यौँ । सोधपुछ गर्न खोज्दा सशस्त्र प्रहरीको ति जवान पर्खाल हाम फालेर भाग्न सफल भए,’ एक स्थानीयले भने, ‘सशस्त्र प्रहरीको निगरानीमा भन्सार कार्यालयमा राखिएका सामान कसले चोर्छ भन्ने बल्ल खुल्यो । सुरक्षाका लागि खटिएका सशस्त्र प्रहरी नै चोरीमा संलग्न भएपछि कसको के लाग्छ र ।’
नाकामा खटिएका सशस्त्र प्रहरीले सर्वसाधारणबाट नियन्त्रणमा लिएका महंगा सामान गायव गर्दै आएको सर्वसाधारणको गुनासो छ । अवैध भएको भन्दै नियन्त्रणमा लिइएका महंगा सामान भन्सार कार्यालयमा दाखिला नगरि विच बाटोबाट गायव बनाउँदै आएको एक पीडितले बताए ।
ति पीडितका अनुसार, भन्सार शुल्क तिर्न खोज्दासमेत सशस्त्र प्रहरीले जवरजस्ती नियन्त्रणमा लिएर भन्सार कार्यालयमा पठाएको नाटक गर्दै आएका छन् । ‘सशस्त्र प्रहरीले नियन्त्रणमा लिएको सामान भन्सार कार्यालयमा खोज्न जाँदा पाइदैन । यसले विच बाटोमै सशस्त्र प्रहरीले गायव गर्छन् भन्ने प्रष्ट हुन्छ,’ ति प्रत्यक्ष भुक्तभोगीले भने ।
भन्सार कार्यालयमा राखिएका सामान मात्र चोरी हुँदैनन् । त्यहाँबाट ट्रकका ब्याट्री र टायर निकाल्न प्रयोग हुने जग समेत चोरी हुँदै आएको पीडित बताउँछन् ।
Discussion about this post