जावेद अन्सरी
बाँके पुस १ गते ।
करोना भाइरसका कारण ९ महिनाभन्दा बढी समयदेखि नेपाल–भारत सीमा नाका बन्द गरिएको छ । कोरोना रोकथाम तथा नियन्त्रणका लागि सरकारले देशमा लकडाउन गरेसँगै अन्तर्राष्ट्रिय सीमा नाका बन्द गरेको थियो । अहिले लकडाउन खुले पनि सीमा नाकाहरु बन्द नै छन् । एक महिना फेरी नाका बन्द गर्ने गृहको निर्देशन आएको बाँकेका सिडिओ रामबहादुर कुरुम्वांगले जानकारी दिनुभयो । सीमा नाका लामो समयदेखि बन्द रहँदा सीमा क्षेत्रका बासिन्दा समस्यामा परेका छन् ।
नेपाल–भारत सीमा बन्द रहेका कारण सीमावर्ती क्षेत्रका नागरिकलाई व्यापार–व्यवसाय, नाता–सम्बन्ध कायम राख्न समस्या भइरहेको जनगुनासो व्याप्त छ । त्यसो त, सरकारले औपचारिक रुपमा सीमा नाका बन्द गरे पनि चोरबाटोबाट आवतजावतका साथै तस्करी मौलाएको छ। ‘सरकारले औपचारिक रुपमा नाकाहरु बन्द गरेको छ तर सानातिना नाकाहरुबाट लुकीछिपी ओहोरदोहोर भइरहेको छ, तस्करी पनि भइरहेको छ ।
‘नाका खुलाउनका तराई केन्द्रीत दलहरुले दवाव दिदै आएका छन। कोरोना महामारी नियन्त्रणका लागि भन्दै बन्द गरिएका यातायात, होटल लगायतका क्षेत्र खुले पनि दुई देश बीचको सीमा नाकामात्र बन्द गर्नुको औचित्य नरहेको उनीहरुको भनाइ छ । ‘तस्करी एवं अवैध कारोबार गर्नेका लागि सीमा नाका खुला छ तर सर्वसाधरणका लागि बन्द छ । नेपालको सीमावर्ती क्षेत्रका बासिन्दामध्ये कयौँको भारततिर वैवाहिक सम्बन्ध छ ।
नाका बन्दका कारण उक्त सम्बन्धमा पनि निकै समस्या आएको छ । हिँडेर आउजाउ गर्न त्यति रोकटोक नभए पनि गाडी आउजाउमा पुरै रोक लगाइएको छ, जसले गर्दा पछिल्लो समय दुई देशका नागरिकबीच वैवाहिक सम्बन्ध गाँस्न कठिनाइ भएको छ । जनता समाजवादी पार्टी कमरुद्धिन राइले संघीय सरकारले नै नेपाल–भारतबीचको सम्बन्धलाई बिगार्ने प्रयास गरिरहेको आरोप लगाउँछन् ।
उनले भने, ‘नेपाल र भारतबीच सामाजिक, सांस्कृतिक तथा आर्थिक सम्बन्ध छ, त्यसमा पनि नेपालको तराई मधेशसँग भारतको त्यस्तो सम्बन्ध बढी छ । तराई मधेशका चेलीबेटीको बिहे भारतमा र भारतका चेलीबेटीको बिहे नेपालमा भएको छ ।’ यस प्रकारको सम्बन्धलाई निरुत्साहित गर्न संघीय सरकारले अनावश्यक रुपमा सीमा नाकाहरु बन्द गरेको उनको आरोप छ ।
Discussion about this post