बाँके पुस ७ गते ।
बाँके जिल्लालाई आउँदो फागुन मसान्तभित्र पूर्णरुपमा खोपयुक्त जिल्ला घोषणा गर्ने तयारी रहेको छ ।
आउँदो फागुन १० गतेभित्र बाँकेका तीन वटा पालिकालाई पहिलो र दोस्रो गरी दुई चरणमा खोप लगाई २०७७ फागुन ३० गते भित्रमा पूर्णरुपमा खोपयुक्त जिल्ला घोषणा गर्ने तयारी गरिएको हो । नेपालगञ्जमा सोमबार बाँकेका आठ वटै स्थानीय तहका प्रमुख, उपप्रमुख, प्रमुख प्रशासकीय अधिकृत र स्वास्थ्य शाखा प्रमुखहरु उपस्थित गोष्ठीमा स्वास्थ्य कार्यालय बाँकेका प्रमुख धिरजंग शाहले खोपयुक्त जिल्ला घोषणा गर्ने लक्ष्यलाई सफल बनाउन सबैमा आग्रह गर्नुभयो । जिल्ला स्वास्थ्य कार्यालय बाँकेको आयोजनामा भएको गोष्ठीमा जिल्लामा खोपको अवस्थाबारे प्रष्ट पार्दै खोप अधिकृत भेषराज शर्माले प्रस्तुतिकरण गर्नुभएको थियो ।
नेपालगञ्ज उपमहागरपालिका, कोहलपुर नगरपालिका, खजुरा गाउँपालिका, डुडुवा गाउँपालिका र जानकी गाउँपालिका पूर्ण खोपयुक्त पालिका घोषणा भएता पनि नरैनापुर, राप्तीसोनारी र बैजनाथ गाउपालिकहरु घोषणा हुन बाँकि रहेको बताउनु भयो । उक्त गोष्ठीमा बोल्दै लुम्बिनी प्रदेशसभा सदस्य सुरेन्द्र हमालले बालबालिकालाई खोपबाट बञ्चित हुन नदिन सबै प्रतिबद्ध हुनुपर्नेमा जोड दिनुभयो । जिल्ला पूर्ण खोप समन्वय समितिका संयोजक एवम् जिल्ला समन्वय समितिका प्रमुख अजय कुमार श्रीवास्तवले आफ्नो पालिकालाई निर्धारित मितिमै खोपयुक्त बनाउन स्थानीय तहहरुलाई प्रतिबद्ध हुन आग्रह समेत गर्नुभयो । नेपालमा जन्मेदेखि १५ महिनासम्मका बालबालिकालाई १२ वटा रोग विरुद्धका १२ वटा खोप लगाउने गरिएको छ ।
सन १९९८ देखी शुरु गरिएको खोपमा नेपालभर जम्मा ४१ करोड बराबरको लगानी भएको तथ्यांकमा आधारित छ। ५ वर्ष मुनिका बालबालिकालाई ३१ वटा रोगको भ्याक्सिन बनिसकेको भएता पनि नेपालमा १२ वटा रोग बिरुद्धको खोप लगाइन्छ ।
गोष्ठीमा कोहलपुर नगरपालिकाका मेयर लुट बहादुर रावत, नरैनापुर गाउँपालिकाका अध्यक्ष इस्तियाक अहमद शाह, बैजनाथ गाउँपालिकाका अध्यक्ष मान बहादुर रुचाल ठकुरी, जानकी गाउँपालिकाकी उपाध्यक्ष भूमीसरा धिताल लगायतको उपस्थिति थियो । त्यसक्रममा सबैले प्रतिबद्धतापत्रमा हस्ताक्षर गर्नुभएको थियो ।
Discussion about this post