रुकुम पुस ११ गते ।
गएको साउन अन्तिम साता रुकुम पश्चिमको त्रिवेणी गाउँपालिकाका लेखापाल हेमन्त केसीले पालिकाको करिव २५ लाख रकम आफ्नो, श्रीमति र भदैको खातामा राखेको पुष्टि भएपछि उनलाई प्रहरीले पक्राउ गर्यो । त्यस्तै चौरझारी नगरपालिकामा साउन पहिलो साता स्थानीय तहले वितरण गरेका फलफुलका विरुवा वितरणमा खरिद र विक्री गर्दा अनियमितता भएको भन्दै किसानले पाएका विरुवामा विरोध स्वरुप आगजनी गरिदिए ।
उता वाफीकोट नगरपालिकाको जन कल्यान माविमा विद्यालय व्यवस्थापन समितिका अध्यक्ष, प्रधानाध्यापक र कार्यालय सहयोगीले १५ लाख रकम हिनामिना गरेको भन्दै अभिभावकहरु विरोधमा उत्रिए । यी तीनवटा घटनामा त्रिवेणीको विषय सामसुम भइसक्यो । तीन दिन हिरासतमा बसेका लेखापाल छुटेर काममा फर्किसके । चौरझारी र वाफीकोटको घटनालाई राजनीतिकरुपमा गुपचुपमा मिलाइयो । यी त उदाहरणमात्र हुन् । रुकुमपश्चिममा भ्रष्टचारका अधिकांश मुद्धा गुुपचुपमै मिलाउने गरेको पाइएको छ ।
नागरिक समाजका अगुवा गोविन्द केसी नियामक निकायनै भ्रष्ट हुँदा यस्ता घटनाहरु गुपचुपमै मिलाउने सस्कार बनेको बताउनुहुन्छ । सुशासन कायम गरी जनताको सेवामा लाग्नु पर्ने सरकारी तथा सार्वजनिक निकायहरुमा राम्रा मान्छे भन्दा हाम्रा मान्छे भन्दै अवसर दिने गरिएका कारण भ्रष्टचार मौलाउँदै गएको जिल्ला बार इकाइका अध्यक्ष एक्कबहादुर पाण्डेले बताउनुभयो । उहाँका अनुसार स्थानीय तहमा भ्रष्टाचार संस्थागत बन्दै गएका कारण अवस्था डर लाग्दो देखिएको पाण्डेको भनाइ छ ।
भ्रष्टचारका मुद्धामा छानविन तथा कारवाही गर्ने जिम्मेवारी पाएको स्थानीय प्रशासन कार्यालयले भ्रष्टाचार सम्वन्धि उजुरी नै कम पर्ने गरेको जनाएको छ । विगत तीन वर्षको अवधिमा अख्तियारमा १३ र जिल्ला प्रशासनमा केवल ४ वटागरी १७ वटा उजुरीमात्र परेको सिडियो बद्रीनाथ गैरेले जानकारी दिनुभयो ।
Discussion about this post