बाँके बैशाख ३० गते ।
बाँकेका पालिकाहरुमा आजै रातीदेखि मतगणना गर्ने तयारी गरिएको छ । कति पालिकामा मतपेटिका संकलन भइसकेको छ भने कति पालिकामा मतपेटिका संकलन हुने क्रममा छन् ।
सबै पालिकाहरुमा मतपेटिका संकलन भइसकेपछि मतगणना शुरु गर्ने तयारी गरिएको छ । “मतपेटिका संकलन भइसकेपछि हामी सर्वदलीय बैठक राख्छौं, त्यही बैठकको निर्णयका आधारमा मतगणनाको कार्य प्रारम्भ हुन्छ,“ सम्बन्धित पालिकाका निर्वाचन अधिकृतहरुले भने ।
नेपालगञ्जमा आजै रातीदेखि मतगणना गर्ने तयारी गरिएको मुख्य निर्वाचन अधिकृत षडानन्द तिवारीले भने । कोहलपुर नगरपालिकामा पनि रातीदेखि नै गणनाको तयारी गरिएको निर्वाचन अधिकृत तिर्थराज भट्टले बताए ।
राप्तीसोनारी गाउँपालिकामा भने भोली विहान ६ बजेदेखि मतगणना गर्ने तयारीमा आफूहरु रहेको निर्वाचन अधिकृत टोपेन्द्र बहादुर केसीले बताए ।जानकीमा सर्वदलीय बैठक बसेर त्यसको निर्णयको आधारमा सकभर आजै रातीदेखि नभए भोली विहान ८ बजेदेखि मतगणना हुने निर्वाचन अधिकृत बासुदेव शर्माले जानकारी दिए ।
नरैनापुरमा पनि छिटोमा राती १२१ बजेतिर नभए भोली विहानदेखि मतगणना शुरु हुने निर्वाचन अधिकृत रेशम आचार्यले बताए । डुडुवामा पनि रातीदेखि नै मतगणना गर्ने तयारी छ ।
निर्वाचन अधिकृत फटिकराज मुडभरीले आजै रातीदेखि गणनाको तयारीमा आफूहरु जुटेपनि सर्वदलीय बैठकको निर्णयका आधारमा अघि बढ्ने बताए ।बैजनाथमा पनि सर्वदलीय बैठकको निर्णय अनुसार या त राती नै त्यो नभए भोली विहानदेखि मतगणना शुरु हुने निर्वाचन अधिकृत टेकबहादुर थापाले जानकारी दिए ।
खजुरामा निर्वाचन अधिकृत लोकबहादुर सुनारले आयोगको निर्देशन अनुसार आफूहरु आजैदेखि मतगणना गर्ने तयारीमा रहेपनि सर्वदलीय बैठकको निर्णय अनुसार अघि बढ्न बताए ।
धेरैजसो मतदान केन्द्रहरुमा साँझ अबेरसम्म मतदान भएकाले मतपेटिका संकलनमा ढिलाई हुँदा मतगणना मध्यराती या भोली विहान शुरु हुने देखिएको छ ।
मतदान अबेरसम्म चल्दा बाँकेमा खसेको मत अझै यकिन हुन सकेको छैन । यद्यपि औषतमा ७० प्रतिशत मत खसेको आंकलन छ ।
Discussion about this post