बाँके कात्तिक २१ गते ।
चुनावको मिति नजिकिदै गर्दा जसपाका नेता तथा बाँके क्षेत्र नं.२ का प्रतिनिधिसभा सदस्य पदका उम्मेदवार मोहम्मद इस्तियाक राईले आफ्नो चुनावी अभियानलाई तीब्रता दिएका छन् ।
आज एकै दिन ८ ठाउँमा घरदैलो तथा कोणसभा गरेका छन् । विहान डुडुवा गाउँपालिकामा चुनावी सभा गरेका राईले मध्यान्ह नेपालगन्ज वडा नं. ८ र ९ का युवासँग अन्तरक्रिया, दिउँसो भेटघाट, आसपानपुरमा पार्टी प्रवेश, टंकपसरी गाउँमा सम्वोधन, गोसाई गाउँमा भेला, मन्नीपुर, नटनपुर्वा र झगरुपुरमा पनि मतदातामाझ आफ्नो चुनावी सम्वोधन गर्न भ्याए । अधिकांश सम्वोधनमा उनले आफ्नो एजेण्डा विकास र सम्बृद्धि भएको स्पष्ट पारेका छन् ।
आफु मन्त्री हुँदा ल्याइएका योजनाहरु कार्यान्वयन भइसकेको भन्दै उनले विकासप्रेमीलाई मत दिन अपिल गरे । उनले जातिय र धर्मको नाममा राजनीति गर्नेहरुलाई मत नदिन आव्हान समेत गरेका छन् ।
उनले भने–‘यहाँ केही व्यक्तिहरु धर्म र जातको नाममा राजनीति गर्न खोजिरहेका छन उनीहरुबाट सचेत रहनु होला । त्यस्ता व्यक्तिले बाँकेको विकास गर्दैनन् ।’ उनले मधेशी तथा मुस्लिम समुदायको अधिकार स्थापनाका लागि आफ्नो विकल्प नभएको समेत प्रष्ट्याएका छन् ।
दुई पटक मेयर भइसकेका व्यक्तिले के कति विकास गरे ? मुल्यांकन गर्ने बेला आएको छ उनले अगाडि भने–‘भेरी अस्पतालको भेन्टिलेटर खरिदका लागि आएको रकम धवलशम्शेर राणाका कारण फिर्ता भयो ।’ उनले राजामहाराजा भनेर अव जनतालाई झुक्याउने दिन समाप्त भएको पनि टिप्पणी गरेका छन् ।
राईले आफ्नो निर्वाचन क्षेत्रका २७ वटै वडामा चुनावी अभियान तीब्र पारेका छन् । उनको चुनावी अभियानमा जनताको साथ र समर्थन जुट्दै गएको छ । दैनिकरुपमा सयौं कार्यकर्ताहरु जसपामा प्रवेश गर्दै राईलाई जिताउने अभियानमा जुट्न थालेका छन् ।
Discussion about this post