बाँके कात्तिक १ गते ।
सशस्त्र प्रहरी बल नम्बर ३० गण बागेश्वरी बाँकेका एसपी रमेश बिक्रम शाहीले सशस्त्र प्रहरी वल केन्द्रिय कार्यालयको सर्कुलर विरुद्ध घुमुवा परिचालन गरि अवैध असुलीलाई निरन्तरता दिएका छन् । एसपी शाहीको निर्देशनमा घुमुवाहरुले सेटिङ मिलाएर असुली धन्दालाई जारी राखेको प्रत्यक्षदर्शी बताउँछन् ।
सशस्त्रका घुमुवाले लाइन लिएर छाडेको अबैध सामान नेपाल प्रहरीले बरामद गरेपछि सशस्त्र प्रहरीको असुली धन्दा बाहिर आएको हो । भन्सार छलेर नेपालगन्ज भित्राइएको अबैध चिनी र चामल नेपाल प्रहरीले बरामद गरेपछि सशस्त्रले नाकामा असुली धन्दा चलाएको खुलासा भएको सर्वसाधारण बताउँछन् । वडा प्रहरी कार्यालयको टोलीले नेपालगन्ज उपमहानगरपालिका–१ राना चोकबाट दुई लाख बढि मुल्यको चिनी र चामल बरामद गरेको हो ।
भारतबाट अबैध रुपमा भन्सार छली चोरी पैठारी गरी ल्याइएको चिनी र चामल वेवारिसे अवस्थामा रहेको भन्ने सूचनाको आधारमा वडा प्रहरी कार्यालयबाट खटिएको टोलीले उक्त स्थानबाट एक लाख ४२ हजार रुपैयाँ मूल्य बराबरको २६ किलोग्रामका ७१ बोरा चामल र ७० हजार रुपैयाँ बराबरको ५० किलोग्रामको १४ बोरा चिनी बरामद गरेको थियो । बरामद चामल र चिनी प्रहरीले नेपालगन्ज भन्सार कार्यालयलाई बुझाइसकेको छ ।
बाँकेमा ६६ किलो मिटर खुला सिमाना छ । नेपालगन्जको जमुनाह नाकामा प्रत्येक सय मिटरको दूरीमा सशस्त्र प्रहरीको पोष्ट छ । तर, पोष्टमा खटिने सशस्त्र प्रहरीहरु तस्करी नियन्त्रण भन्दा असुली कसरी गर्न सकिन्छ भन्ने मानसिकतामा केन्द्रित छन् । जसका कारण मुख्य नाकाबाटै तस्करहरुले सामान भित्र्याइरहेका छन् ।
सशस्त्र प्रहरीका एसपीले तस्कर र तस्करीको जालो पत्ता लगाउन घुमुवा परिचालन गरेका पनि ति घुमुवाहर तस्करसँंग मिलेर असुली धन्दा मच्चाइरहेका छन् । त्यसको ज्वलन्त उदाहरण हिजो साँझ बरामद भएको चिनी र चामल हो ।
नाकाबाट सशस्त्रको सेटिङमा भित्रिएपछि नेपालगन्ज भित्र्याइएको उक्त चिनी र चामल वडा प्रहरी कार्यालय बाँकेबाट खटिएको टोलिले बरामद गर्न सफल भएको हो ।
सशस्त्र प्रहरी बल नम्बर ३० गण बागेश्वरी बाँकेका एसपी रमेश बिक्रम शाहीले नियम विपरीत आफैले घुमुवा राखेका छन् । एसपी शाहीले घुमुवा खटाएर नै असुली गर्दै आएको स्रोत बताउँछ । एसपीले खटाएका घुमुवाले सेटिङ मिलेका अवैध सामानहरु आफैले स्कटिङ गरेर सीमा पार गराउने गरेको स्रोत बताउँछ ।
एसपी शाहीले तस्करी गराउनकै लागि असई सोम राज शर्मा र सहायक हवल्दार सन्तोष सुनारलाई घुमुवा खटाएका छन् ।
सशस्त्र प्रहरीमा गोप्य सूचना संकलनका नाममा घुमुवा राख्न नपाइने नियम तोडेर एसपी शाहीले आफू निकटका तस्करहरुसँग रकम उठाउन सक्ने व्यक्तिलाई घुमुवाको रुपमा परिचालन गरेका छन् ।
विओपीका अधिकांश पोष्ट इन्चार्जहरुले असुली धन्दाका लागि लाइन मिलाएका छन् ।
नेपाल–भारत सीमा अन्तरगत बाँकेको खडैचा, हिरमिनिया, भज्जुपुरुवा, नयाँ वस्ती, जमुनाह, जयसपुर, पचपोखरा, साइगाउँ, बढैया, सैनिकलगायतका सहायक नाका चोरी तस्करीका लागि प्रमुख सहायक नाका हुन् ।
Discussion about this post