बाँके कात्तिक ८ गते ।
नेपालगञ्ज लगायत आसपास क्षेत्रमा घटस्थापनाको दिन विधिवत रुपमा पूजाआजा गरी स्थापना गरिएका दुर्गा भगवतीको मूर्ति बुधवार बिसर्जन गरिएको छ । १० दिनसम्म पूजाआजा गरि राखिएको मुर्तिलाई आज बुधबार नेपालगन्जको विभिन्न भागको परिक्रमा गराई राप्ती नदीमा बिसर्जन गरिएको हो ।
मुर्तिलाई बाँकेका विभिन्न नदी किनारमा लगेर विधिवत पुजा गरेर विसर्जन गर्ने गरिन्छ ।
मुर्ति बिसर्जन गर्दा सयौँ संख्यामा भक्तजनको उपस्थिति रहेको थियो ।
नवदुर्गा भवानीको १० दिनसम्म चलेको पूजामा हिन्दु, मुस्लिम, सिख, इसाईलगायतका धर्मावलम्बीहरुले एकापसमा शुभकामना साटासाट गर्नुका साथै पर्वमा सामाजिक सद्भाव र भाईचारा कायम राख्न समाजका अगुवाले स्थानीय स्तरमा समन्वय र सहकार्य गरेका थिए ।
नेपालगन्ज क्षेत्रबाट करिव दुई सय दुर्गा मूर्ति सेलाउन राप्ती नदीस्थित सिधनिया घाटमा लगिएको बाँके प्रहरी प्रवक्ता डिएसपी नारायण डाँगीले जानकारी दिए ।
ट्रक, ट्याक्टर र पिकअप भ्यानमा राखेर दुर्गा मूर्ति लगिएको छ । दुर्गा मूर्ति विसर्जनलाई सहज र मर्यादित बनाउन ठूलो संख्यामा नेपाल प्रहरी र सशस्त्र प्रहरी परिचालन गरिएका छन् । अहिलेसम्म शान्तिपूर्ण रुपमा दुर्गा मूर्ति विसर्जन भइरहेको बाँकेका प्रहरी प्रवक्ता डिएसपी डाँगीले बताए ।
उनले कुनै अप्रिय घटना हुन नदिन उच्च सतर्कता अप्नाइएको बताए । केहि दिन अघि भएको घटनाबाट पाठ सिकेर ठूलो संख्यामा सादा पोशाकमा प्रहरी परिचालन गरिनुका साथै सदरलाइन, त्रिभुवन चोक, त्रिवेणी मोड, राप्ती रोड, घरबारी टोल, विपि चोक लगायतका घरका छतमा समेत प्रहरी राखिएका छन् ।
मुर्ति विसर्जनका क्रममा आयोजना गरिएका र्यालीमा अपराधिक ब्यक्तिको घुसपैठ हुन नदिन प्रहरीले नगरका विभिन्न भागमा ड्रोन मार्फत अवलोकन गरेको प्रहरीले जनाएको छ । सुरक्षास्थितिको बारेमा बुझ्न प्रमुख जिल्ला अधिकारी श्रवणकुमार पोखरेल, बाँकेका प्रहरी प्रमुख सुभाष चन्द बोहरा, जिल्लास्थित नेपाली सेना प्रमुख, सशस्त्र प्रहरी प्रमुख समेत नेपालगन्ज बजारमा खटिएका छन् । उनीहरु त्रिभुवन चोक, त्रिवेणी मोड, राप्ती रोडमा आफै खटिएको प्रहरी प्रवक्ता डिएसपी डाँगीले बताए ।
उनले दुर्गा मूर्ति विसर्जनका क्रममा भएको र्यालीमा मुस्लिम, शिख, इसाई लगायतका धर्मावलम्वीले सहयोग गरेको बताए । विभिन्न धर्ममा आस्था राख्ने अगुवाहरु सडक छेउमा आएर र्यालीको स्वागत गरेको बताउँदै उनले शान्तिपूर्ण बनाउन सवैको साथ सहयोग रहेको बताए । ‘मुर्ति विसर्जनका क्रममा भएको र्यालीलाई सभ्य र मर्यादित बनाउन सवै धर्म र आस्था राख्ने सर्वसाधारण, अगुवा एवम् बुद्धिजीविको साथ, सहयोग र समन्वय पाएका छौँ,’ उनले भने, ‘नेपालगन्जलाई सद्भावको सहरको रुपमा स्थापित गराउन सवैको साथ, सहयोग रहेको छ ।’
बाँकेका प्रमुख जिल्ला अधिकारी श्रवणकुमार पोखरेलले मुर्ति विसर्जन शान्त, सभ्य र मर्यादित रुपमा भएको बताउँछन् । उनले मुर्ति विसर्जनमा सवै धर्म र सम्प्रदायको अतुलनिय साथ र सहयोग पाएको बताए । ‘धार्मिक सहिष्णुताको कदर गरि सवै धर्म र सम्प्रदायको साथ एवम् सहयोगले मुर्ति विसर्जन सभ्य, भब्य, शान्त र मर्यादित रुपमा सम्पन्न भएको छ,’ उनले भने, ‘मुर्ति विसर्जन गर्ने क्रममा भएका र्यालीलाई सफल बनाउन साथ, सहयोग गर्ने सवैलाई धन्यवाद ।’
Discussion about this post