बाँके मंसिर १० गते ।
भौतिक पूर्वाधार तथा यातायात मन्त्री प्रकाश ज्वालाले राप्तीसोनारी गाउँपालिकाको समस्या समाधानका लागि आफ्नोतहमा पहल गरिने बताउनुभएको छ ।
राप्तीसोनारी गाउँपालिकाको माछेवास धामपुर जोड्ने ५५४.४५ मिटर लामो राप्तीनदी पुलको शनिवार उद्घाटन गर्दै मन्त्री ज्वालाले देशको सबैभन्दा धेरै जनसंख्या र ठूलो भुगोल भएको गाउँपालिका भएपनि विकासको मूलप्रवाहमा राप्तीसोनारी पिछडिएको भन्दै आफ्नो तहबाट यसको उत्थानका लागि पहल गरिने विश्वास दिलाउनुभयो ।
मन्त्री ज्वालालाई स्थानीय जनप्रतिनिधि, प्रदेश र संघीय जनप्रतिनिधिहरुले यहाँको समस्याबारे ध्यानाकर्षण गराउनु भएको छ उहाँले भन्नुभयो–‘मेरो तहबाट समस्या समाधानका लागि गर्नुपर्ने सहयोग सबै हुन्छ ।’ उहाँले राप्तीसोनारी गाउँपालिकालाई राप्तीनदीले क्षती पुर्याएपनि स्रोतको हिसावले निकै धनी रहेको औल्याउनुभयो ।
सम्भावना भएर पनि विकास निर्माणका सवालमा पालिकामा थुप्रै कामहरु गर्न बाँकी रहेको पनि उहाँले बताउनुभयो । ‘यहाँ ठूलो वनजंगल छ । अन्य प्राकृतिक स्रोतको प्रचुर सम्भावना छ । यसको सदुपयोग गरेर पालिकालाई सम्बृद्ध बनाउन सकिन्छ’ उहाँले भन्नुभयो ।
राप्तीसोनारी गाउँपालिकामा सल्यान र दंगालीहरुको समेत बसोबास रहेकोले आफ्नो स्वभाविक भावना जोडिएको उहाँले बताउनुभयो ।
यस्तै बाँके क्षेत्र नं.१ बाट प्रतिनिधिसभामा निर्वाचित प्रतिनिधिसभा सदस्य सूर्य ढकालले राप्तीसोनारीको विकास र सम्बृद्धिसङ्गै राप्ती नदीको कटान, सडक निर्माण लगायतका सवालमा मन्त्रीको ध्यानाकर्षण समेत गराउनु भएको छ। उहाँले अहिलेको परिस्थिति विकास निर्माणका लागि अनुकूल रहेको पनि उल्लेख गर्नुभयो ।
यस्तै लुम्विनी प्रदेश सभा सदस्य कृष्णा केसी नमूनाले पनि विकास निर्माणमा सहयोग गर्न मन्त्री ज्वालाको ध्यानाकर्षण गराउदै हुलाकी मार्ग अन्तर्गत अगैयादेखि कुसुम सडक खण्डको निर्माणमा तीब्रता दिन उहाँले आग्रह गर्नुभयो।
बाँके राष्ट्रिय निकुञ्जका कारण वन्यजन्तुको जोखिम बढेकाले पूर्वपश्चिम राजमार्गको विकल्पमा बैकल्पिक राजमार्ग निर्माणलाई तीब्रता दिन र राप्तीनदीको सिधनिया घाटमा पुल निर्माणलाई गतिदिन आग्रह समेत गर्नुभएको छ।
तत्कालीन पूर्वाधारमन्त्री मोहम्मद इस्त्यिाक राईले उक्त पुलको शिलान्यास गर्नुभएको थियो । तर अहिले उक्त पुलको निर्माण कार्य अगाडि बढ्न सकेको छैन । त्यहाँको अवस्था र आवश्यकताका आधारमा पुल निर्माण गरिनुपर्ने उहाँको भनाइ छ । ’अहिले त्यहाँ ७ सय मिटरको पुल निर्माणको लागि डिजाइन भएको छ । तर त्यहाँ ११ सय मिटर लम्वाई भएको पुलको आवश्यकता छ उहाँले भन्नुभयो–’यसतर्फ मन्त्रीको ध्यानाकर्षण गराउन चाहन्छु।
यस्तै राप्तीसोनारी गाउँपालिकाका अध्यक्ष तप्तबहादुर पौडेलले भुगोल र जनसंख्याको हिसावले सबैभन्दा ठूलो गाउँपालिका भएपनि संघीय सरकारले राप्तीसोनारीलाई प्रभावकारी सहयोग नरहेको हुदा विकास निर्माणका दृष्टिकोणले पालिका पिछडिएको भन्दै पुलपुलेसा र सडक निर्माणमा सहयोग गर्न आग्रह गर्नुभयो।
यदी मुगुवा खोलाको पुल मात्र बन्न सक्यो भने पश्चिमका वडा नं. ८ र ९ लाई जोड्न सकिन्छ । कचनापुर कम्दी सडकलाई निर्माण गर्न सकियो भने नेपालगन्जसँगको दूरी घट्छ । यसतर्फ केन्द्र सरकारले सहयोग गरोस् भन्ने चाहाना आफ्नो रहेको अध्यक्ष पौडेलको भनाई रहेको छ।’ उहाँले मुगुवा खोलामा पुल नबन्दा बर्खायाममा विद्यार्थी बालबालिकाले ठूलो सास्ती खेप्नु परेको उल्लेख गर्नुभयो । यस्तै स्थानीय उत्पादनलाई समेत बजारीकरण गर्न समस्या परेको उहाँको भनाइ छ । उहाँ ले यातायातसँगको सहज पहुँचका हुलाकी सडक निर्माणलाई गति दिन पनि आग्रह गर्नुभयो।
Discussion about this post