बाँके माघ २१ गते ।
जनता समाजवादी पार्टी (जसपा), बाँकेले संगठन विस्तारलाई तीव्रता दिएको छ । संगठन विस्तार अन्तरगत पुराना सदस्यको सदस्यता नविकरण र नयाँ सदस्यता वितरण कार्यलाई सँगसँगै लगेको (जसपा) बाँकेका जिल्ला अध्यक्ष कमरुद्दिन राईले जानकारी दिए ।
उनले नेपालगन्ज उपमहानगरपालिकाको वडा नं. ४, ८, १९ र २० मा संगठन विस्तार गरिएको बताए । यी वडामा करिव पाँच सय जनालाई नयाँ सदस्यता वितरण गरिएको उनको भनाई छ । ‘आगामी निर्वाचन र पार्टीको अधिवेशनलाई मध्यनजर गरि संगठन विस्तारमा जुटेका छौँ,’ उनले भने, ‘नेपालगन्जका सवै वडामा भेला र सभा गरि संगठन विस्तार गर्ने पार्टीको योजना छ ।’
संगठन विस्तारका लागि जसपाकी केन्द्रिय सदस्य बेबि तबस्सुम अन्सारी वडामा खटिएकी छन् । वडा–वडामा पुगेर संगठन विस्तारमा खटिएकी उनले जनताको समस्या संकलन समेत गरिरहेको बताइन् । ‘नयाँ सदस्यता वितरणमात्र गरिरहेका छैनौँ । जनताले भोगिरहेका समस्या, विकास, निर्माण सम्बन्धि माग संकलन गरेर योजना माग गर्ने नीति समेत लिएका छौँ,’ उनले भनिन् ।
उनले संगठन विस्तारको क्रममा वडामा पुग्दा जनताको सहभागिता उत्साहजनक पाएको जिकिर गरिन् । ‘भेलामा जनताको सहभागी उत्साहजनक पाउँदा खुसी लागेको छ,’ उनले भनिन् ।
Discussion about this post