बाँके फागुन १३ गते ।
प्रतिनिधिसभा निर्वाचनका बेला मतदाताको मत आकर्षण गर्न उम्मेदवारले लोकप्रिय नारा लगाए । पूरा गर्न नसक्ने प्रतिवद्धता जनाए । आकाशको तारा झार्न समेत तयार भए । राष्ट्रिय प्रजातन्त्र पार्टीका उम्मेदवार डा. धवलशमशेर राणाले पनि मतदातालाई आकर्षण गर्न मिठा र क्याची नारा दिए । उनले नेपालगन्ज क्षेत्रमा रासायनिक मलको कारखाना खोलेर हरेक वर्ष किसानले झेल्दै आएको समस्या समाधान गर्ने आश्वासन दिए ।
उनले उक्त नारा लगाएको एक वर्षभन्दा धेरै भइसकेको छ । त्यतिबेला मतदातासँग गरेका बाचा उनले विर्सिएर राजतन्त्र फर्काउने भाषण सदनमा गरिरहेका छन् । उनले मरेको राजतन्त्र फर्काउने भाषण सदनमा मात्र नभई सडकमा समेत लगाउन भ्याएका छन् । उनले मल कारखाना खोल्न मोटो रकम लाग्ने जान्दाजान्दै पनि मत तान्न त्यतिबेला उक्त नारा मतदातामाझ फालेको राजनीतिक विश्लेषक बताउँछन् ।
उनी विजय भएपछि होटल बाटिकामा आयोजित सभामा समेत नेपालगन्जमा मल कारखाना स्थापना गरेरै छाड्ने दावी गरेका थिए । ‘मैले रासायनिक मल कारखाना खोल्ने प्रतिवद्धता निर्वाचनका बेला गरेको छु । उक्त प्रतिवद्धता अनुसार कारखाना खोल्ने प्रतिवद्धता फेरि जाहेर गर्दछु,’ उनले सभालाई सम्बोधन गर्ने क्रममा भनेका थिए ।
तर, एक वर्ष नवित्दै आफूले गरेको प्रतिवद्धता विर्सेर अर्को लाइन समातेर राजा फर्काउने अभियानमा लागेका छन् । उनले विकास, निर्माणमा पनि खासै चासो नदिएको आममतदाताको गुनासो छ । ‘नेपालगन्जको मेयर भएको बेला राम्रो काम गरेको जस्तो लाग्थ्यो, तर सांसद भएपछि माखो मारेको जस्तो लाग्दैन,’ एक मतदाताले भने, ‘मल कारखाना खोल्छु भन्नु हुन्थ्यो, जितेर गएपछि राजा फर्काउने नारा लगाउन थाल्नु भएको छ ।’
Discussion about this post