बाँके फागुन २३ गते ।
खासगरी चाडपर्वका समयमा बजार अनुगमन तीब्र हुने गरेको छ । कतिपयले बजार अनुगमनलाई मौसमी अनुगमनको सज्ञा दिने गरेका छन् । तर बाँके प्रशासनले भने यो पटक बजार अनुगमनलाई सघन बनाएको छ ।
बाँकेमा बजारमा देखिएको बेथिति अन्त गर्न जिल्ला प्रशासन कार्यालयअन्तर्गत रहेको बजार अनुगमन समितिले अनुगमनलाई निरन्तर तीव्र पारेको जनाएको छ । जिल्ला प्रशासन कार्यालय बाँकेले दिएको जानकारी अनुसार बजारमा रहेका विभिन्न बेथितिबारे जनताको विभिन्न गुनासो आएकाले बजार अनुगमनलाई निरन्तर गरिएको हो ।
तीन महिनाको अवधिमा बाँकेका १९६ वटा पसल र व्यावसायिक फर्ममा अनुगमन गरिएको बाँकेका प्रमुख जिल्ला अधिकारी श्रवणकुमार पोखरेलले बताए । उनले गत तीन महिनामा बजार अनुगमन तीव्र पारिएको जनाउँदै सो क्रममा धेरै पसल र व्यावसायिक प्रतिष्ठानलाई जरिवाना र कारवाही गर्नुका साथै चेतावनी समेत दिइएको बताए ।
समितिले अनुगमनका क्रममा अवैध मालसामान नष्ट गर्नेदेखि व्यवसायमा ताला नै लगाउने काम गर्दै आए पनि बजारमा बेथिति भेटिने क्रम भने कम भएको छैन । जति पटक अनुगमन गरे पनि बेथिति फेला पर्ने गरेको समितिले जनाएको छ । सोही क्रममा जिल्ला प्रशासन कार्यालयअन्तर्गत रहेको संयुक्त बजार अनुगमन समितिले पछिल्लो पटक फेरि पनि नेपालगन्ज र जानकी गाउँपालिकाको बजार अनुगमन गरेको छ ।
Discussion about this post