बाँके चैत १७ गते ।
कोहलपुर नगरपालिकाले नगर अस्पतालबाट अव विशेषज्ञ सेवा दिने भएको छ । कोहलपुर नगरपालिकामा रहेको नगर अस्पतालबाट आइतवार, बुधवार र शुक्रबार विशेषज्ञ सेवा प्रदान गरिने छ ।
नेपालगन्ज मेडिकल कलेज कोहलपुरसँगको सहकार्यमा विशेषज्ञ सेवा दिन लागिएको स्वास्थ्य वीमा संयोजन समितिका सदस्य वीरेन्द्र कुमार शाहले जानकारी दिए । उनका अनुसार आइतवार प्रसूति तथा स्त्रीरोग विशेषज्ञ सेवा, बुधवार जनरल फिजिसियन र शुक्रबार शल्य चिकित्सा सेवा प्रवाह गर्नेछ ।
स्वास्थ्य वीमा वोर्डमा सूचिकृत मेडिकल कलेज कोहलपुरका चिकित्सकहरुले नगर अस्पतालबाट विशेषज्ञ सेवा प्रदान गर्नेछन् । जटिल खालका समस्या देखिएका बिरामीहरुलाई मेडिकल कलेजमा रिफर गरिनेछ । कोहलपुर नगरपालिका स्वास्थ्य वीमा संयोजन समिति संयोजक समेत रहेका नगर प्रमुख पूर्ण प्रसाद आचार्यको अध्यक्षतामा बसेको बैठकले वैशाखको पहिलो सातादेखि विशेषज्ञ सेवा दिने तयारी गरेको हो ।
मेडिकल कलेजमा वीमा कार्यक्रम बैशाख पहिलो सातादेखि सुरु गर्ने तयारी छ । उक्त कार्यक्रम सुरु भएपछि नगर अस्पतालमा पनि विशेषज्ञ सेवा सुरु हुने शाहले बताए । नगर पालिकाले आफ्नै फार्मेसी समेत संचालनको तयारी गरेको छ ।
Discussion about this post