बाँके साउन १० गते ।
जिल्ला प्रहरी कार्यालय, बाँकेको मातहतमा रहेको साईगाउँ प्रहरी चौकीले तस्करी भईरहेको सूचना पाएपछि करिब ६ लाख बराबरको भन्सार छली ल्याउन लागेको अवस्थामा सामान बरामद गरेको विभिन्न संचारमाध्यममा समाचार प्रकाशित भयो ।
बुधवार भारतीय सिमा नाका रुपैडिहा हुँदै पचपोखरा आउने क्रममा सुराकीको आधारमा साईगाउँ प्रहरी चौकीका इन्चार्ज प्रहरी नायव निरीक्षक विष्णु शाही र जिल्ला प्रहरी कार्यालयका सादा पोशाकका प्रहरी समेतको सहयोगमा ६ लाख बढीको सुर्तीजन्य, मोविल र कपडा बरामद गरेको स्वयम प्रहरी चौकीका इन्चार्ज शाहीले विभिन्न मिडियामा जानकारी गराएका थिए । तर शाहीको नेतृत्वमा बरामद गरेको ६ लाख मध्ये करिव पाँच लाखको अवैध सामान भने गायव भएको छ ।
यो त्यतिबेला मात्रै थाहा भयो जव जिल्ला प्रहरी कार्यालयले आफ्नै फेसबुक पेजमार्फत सार्वजनिक गर्यो । जिल्ला प्रहरी कार्यालयले आफ्नो आधिकारिक फेसबुकमा प्रहरी नायव निरीक्षक शाहीको कमाण्डमा बरामद गरिएको सामान केवल एक लाख १७ हजार ९ सय ७४ रुपैयाँ मुल्य बराबरको रहेको छ । उसो भए बाँकी करिव ५ लाखको अवैध सामान कहाँ गयो ? प्रहरी स्रोत भन्छ–‘साईगाउँ प्रहरी चौकीका इन्चार्ज प्रहरी नायव निरीक्षक विष्णु शाहीले तस्करसँगको सेटिङमा भित्रिएको सामान फेरी तस्करलाई फिर्ता गरिदिए । त्यसैले जिल्ला प्रहरी कार्यालयसम्म आउँदा बरामद गरिएको ६ लाखको सामान एक लाख १७ हजारमा खुम्चिएको हो ।’
जिल्ला प्रहरी कार्यालयबाट सादा पोषाकमा प्रहरी हवल्दार अतिस खानको कमाण्डमा खटिएको टोलिसँग साईगाउँ प्रहरी चौकीका इन्चार्ज शाहीसँग लामो सेटिङ छ । खानको बारेमा अनलाइन खोजखवरले समाचार प्रकाशन गर्दा शाहीले खानको समाचार हटाउन अनलाइन खोजखवरलाई फोननै गरेका थिए । उनले भनेको अडियो सुरक्षित छ ।
शाहीको सम्वन्ध सशस्त्र प्रहरीका घुमुवासँग पनि उत्तिकै राम्रोछ । किनभने तस्करसँग सेटिङ गर्न सशस्त्रका घुमुवालाई पनि आफ्नो टिममा राख्न उपयुक्त हुन्छ भन्ने कुरा शाहीलाई राम्रोसँग थाहा छ ।
त्यही भएर उनले सादा पोषाकका प्रहरीदेखि सशस्त्रका घुमुवालाई पनि आफ्नो अनुकूल बनाएका छन् । काठमाडौं दरवन्दी भइ हाल काजमा बस्दै आएका शाही डिएसपी नारायण डाँगी र केही नेताहरुको निकट मानिन्छन् । डिएसपी डाँगी इनेस्पेक्टर हुँदा वडा प्रहरी कार्यालय नेपालगन्जको इन्चार्ज थिए । त्यतिबेला शाही असइ थिए । र उनी वडा प्रहरी कार्यालयको एकाउन्ट हेर्थे । त्यतिबेलैदेखि डिएसपी डाँगीसँग शाही नजिक छन् ।
शाही काजमा भएपनि उनलाई इन्चार्जको जिम्मेवारी दिएर डाँगीले पुरष्कृत गर्दै आएका छन् । दरवन्दी भएका कैयौं अधिकृतहरु जिल्ला प्रहरी कार्यालयमा हाइ कार्दै बसिरहेका छन् । तर शाहीको रवाफ देखेर उनीहरु निरही छन् । यसअघि प्रहरी चौकी जयसपुरको इन्चार्ज हुँदा पनि शाहीले भारतबाट भित्र्याइएको अवैध मोवाइल प्रकरणमा तस्करसँग लायन लिएर छाडेको भन्दै जिल्ला प्रहरी कार्यालयले जिम्मेवारीबाट खोसेर फिर्ता बोलाएको थियो । त्यति विवादित व्यक्तिलाई बारम्वार किन इन्चार्जको जिम्मेवारी दिने गरिएको छ ? प्रहरी स्रोत भन्छ–‘शाही डिएसपीका सबैभन्दा प्रिय छन् । के गर्नु हजुर ?’ बुधवार इन्चार्ज शाही समेतले पक्राउ गरेको अवैध सामान पनि घरबाट बरामद गरेको खुलेको छ ।
सशस्त्र प्रहरीले अवैध सामान भएको शंकाका आधारमा ति घरमा छापा हानेको सशस्त्र स्रोतले बताएको छ । अवैध सामान भएको सशस्त्रले थाहा पाएपछि प्रहरीलाई खवर गरेको थियो । त्यही सामान शाहीले आफ्नो नेतृत्वमा बरामद गरेको भन्दै मिडियावाजी गरेका थिए ।
जवकी मिडियालाई जानकारी गराउन उनले माथिल्लो तहबाट अनुमति लिनुपर्छ । तर प्रहरी प्रवक्ताकै भूमिकामा उनले आफु अनुकूलका मिडियालाई सूचना दिने गरेको पाइएको छ ।
Discussion about this post