बाँके असोज २० गते ।
सन्तोष शर्मा सशस्त्र प्रहरी बलका असई हुन् । उनी कार्यरत नेपालगन्जस्थित बाँके जिल्ला कारागारमा हो । तर, उनी सशस्त्र प्रहरी बल ३० नं. गण हेडक्वार्टर बागेश्वरी महेन्द्रनगरले खटाएका सादा पोशाकका घुमुवाको नाइकेको भूमिकामा छन् ।
उनलाई सघाउन सशस्त्र प्रहरीका बरिष्ठ हवल्दार दिनेश तिवारी, सहायक प्रहरी हवल्दार लालसिंह मिजार र बरिष्ठ हवल्दार धोजबहादुर रोकालाई खटाइएको छ । यो टोलीलाई ३० नं. गण हेडक्वार्टर बागेश्वरीले नाकामा हुने अवैध तस्करी नियन्त्रण गर्न परिचालन गरेको हो ।
अवैध रुपमा हुने तस्करी नियन्त्रण गरि राजस्व बढाउन सघाउने हेतुले यी सशस्त्र प्रहरी परिचालन भए पनि यो टोलीले तस्करी नियन्त्रणभन्दा तस्करसँग मोटो रकम लिएर अवैध सामानलाई नेपालगन्ज भित्र्याउन सहयोग गरिरहेको स्थानीयबासीको भनाई छ ।
भारतीय बजारबाट अवैध रुपमा समान भित्रिन नदिन नेपाल प्रहरीले जस्तै सशस्त्र प्रहरीले पनि जमुनाह, भन्सार र चौलिकामा चेकजाँच गर्छ । सशस्त्र प्रहरी र नेपाल प्रहरीले ब्यारियल लगाएर संयुक्त रुपमा सामान चेकजाँच गरे पनि तस्करहरुले अवैध रुपमा सामान ल्याउन कसरी सम्भव भएको छ ? सर्वसाधारणको प्रश्न छ । ‘सशस्त्र प्रहरीका घुमुवाले लाइन दिएकै कारण तस्करहरुले अवैध सामान नेपाल भित्र्याउन सकेका हुन्,’ एक प्रत्यक्षदर्शीले अनलाइन खोजखवरसँग भने ।
असई शर्मा नेतृत्वको टोलीले घर खर्चका लागि ल्याएको थोरै सामान जफत गरेर आफूभन्दा माथिल्लो प्रहरी अधिकृतलाई देखाउने गरेको सर्वसाधारणको गुनासो छ । सशस्त्र प्रहरीका घुमुवाले ठूला तस्करलाई लाइन दिएर मोटो रकम असुलीरहेको नाम नबताउने शर्तमा तस्करका एक नाइकेले बताए । उनीहरुले हाकीमको नाम बेचेर तस्करहरुसँग रकम लिइरहेको स्रोतले जानकारी दिएको छ । स्रोत भन्छ, ‘चाडपर्व आयो हाकीमहरुलाई बुझाउनु पर्छ भन्दै तस्करहरुसँग मोटो रकम असुली गरिरहेको प्रत्यक्ष देख्न सकिन्छ ।’
नेपाल–भारत सीमा नाकामा सशस्त्र प्रहरीसँगै नेपाल प्रहरीको चौकी समेत पनि छ । सशस्त्र प्रहरीसँगै नाकामा रहेका नेपाल प्रहरीको चौकीमा कार्यरत इन्चार्जले पनि तस्करसँग मिलेर कमाउ धन्दामा लागेका छन् । ‘सशस्त्र प्रहरीलाई मात्र लाइन दिएर अवैध रुपमा सामान ल्याउन सकिदैन । सशस्त्र र नेपाल प्रहरी दुवैलाई मिलाउन सक्ने हो भने मात्र अवैध रुपमा सामान भित्र्याउन सकिन्छ,’ एक तस्करले भने ।
नेपाल–भारत सीमा अन्तरगत बाँकेको खडैचा, हिरमिनिया कालाबन्जार, भज्जुपुरुवा, नयाँ वस्ती, जमुनाह, जयसपुर इच्छाराम बाबा मन्दिर पछाडी, पचपोखरा, साईगाउँ, बढैया, सैनिक लगायतका सहायक नाकाबाट तस्करले अवैध रुपमा सामान भित्र्याइरहेको एक स्थानीयले अनलाइन खोजखवरलाई जानकारी दिए । ‘मुख्य नाकामा कडाई गरिए पनि सहायक नाकामा रहेका सशस्त्र र नेपाल प्रहरीका इन्चार्जले तस्करबाट मोटो रकम लिएको प्रष्ट देखिन्छ,’ एक स्थानीयले भने ।
Discussion about this post