बाँके कात्तिक ८ गते ।
बाँकेका आदेश कुमार अग्रवाल लुम्विनी प्रदेशको मन्त्री बनेका छन् । अग्रवालले आन्तरिक मामिला तथा कानुनमन्त्रीको जिम्मेवारी पाएका छन् ।
उनी बाँके क्षेत्र नं. २ प्रदेशसभा ‘ख’ बाट विजयी भएका थिए । अग्रवाल ८ हजार २४६ मतसहित विजयी हुँदा उनका निकतम प्रतिस्पर्धी एमालेका निरक गुरुङले ६ हजार ७०९ मत पाएका थिए । लुम्बिनीका मुख्यमन्त्री चेतनारायण आचार्यले मन्त्रिपरिषद् विस्तार गर्ने क्रममा कांग्रेसका दुई र जसपाका एक मन्त्री थपेका हुन् ।
मुख्यमन्त्री आचार्यले बर्दियाबाट निर्वाचित कांग्रेसका जन्मजय तिमिल्सिनालाई सामाजिक विकासमन्त्री, पश्चिम नवलपरासीका देवकरण कलवारलाई वन तथा वातावरणमन्त्री बनाएका छन् । त्यस्तै अशोक राई नेतृत्वको जसपाबाट बाँकेका अग्रवाललाई आन्तरिक मामिला तथा कानुनमन्त्री बनाएका छन् । नवनियुक्त मन्त्रीहरुले आजै सपथ लिएका छन् ।
लुम्बिनीका १२ मन्त्रालयमध्ये एमालेले मुख्यमन्त्रीसहित ५, कांग्रेसले आर्थिक मामिला तथा योजना मन्त्रालयसहित ५ र सरकारलाई समर्थन गरेका ४ साना दलमध्येबाट पहिलो चरणमा २ दललाई सरकारमा सहभागी गराउने सहमति भएको थियो । साना ४ दलमध्ये एमालेले पहिलो चरणमा जसपालाई मन्त्री दिएर जनमतलाई दोस्रो चरणमा दिने भएको छ ।
कांग्रेसले लोसपा र नागरिक उन्मुक्तिमध्ये कसलाई पहिला दिने भन्ने टुंगो लगाउन सकेको छैन ।
Discussion about this post