बाँके जेठ २९ गते ।
बाँकेको नेपालगन्ज नाका लागु औषधको ट्रान्जिट प्वाइन्टको रुपमा मानिन्छ । यहि नाका भएर लुम्विनी, कर्णाली र सुदूरपश्चिमका पहाडी तथा हिमाली जिल्लामा लागु औषध पुग्ने गरेको छ । नेपालगन्जबाट काठमाडौँसम्म लागु औषधको कारोवार हुन्छ । खुला सिमाना, भारत आउजाउ सहज भएकोले लागु औषध कारोवारी तथा प्रयोगकर्ताले नेपालगन्जलाई लागु औषधको ट्रान्जिट प्वाइन्ट बनाएका हुन् ।
पछिल्लो समय लागु औषध अभिभावकको मात्र नभई नेपाल प्रहरीको समेत टाउको दुखाईको विषय बनेको छ । लागु औषधले विकराल रुप लिएपछि नेपाल प्रहरीको ठूलो युनिट यसमा लागेको छ । यो समस्यालाई निराकरण गर्न बाँके प्रहरीले तदारुकता देखाएको छ । ‘नेपालगन्ज लागु औषधको ट्रान्जिट प्वाइन्ट बनेको छ । ट्रान्जिट प्वाइन्टलाई तहसनहस बनाउने बाँके प्रहरीको योजना छ,’ बाँके प्रहरी प्रमुख एसपी रामप्रसाद घर्तीमगरले अनलाइन खोजखवरसँग भने ।
बाँके प्रहरी प्रमुखको रुपमा आउने वित्तिकै एसपी रामप्रसाद घर्तीमगरले लागु औषध नियन्त्रणलाई प्राथमिकतामा राखेर सादा पोशाकमा प्रहरी परिचालन गरेका छन् । लागु औषधले अपराध बढाउने निश्कर्षसहित अगाडी बढेको उनले बताए । ‘लागु औषधले अपराध बढाउँछ । परिवार र समाज विखण्डन गर्छ नै धन र जनमा समेत क्षति पुर्याउँछ,’ उनी भन्छन्, ‘लागु औषध नियन्त्रण भए अपराधका घटना पनि घट्ने देखिन्छ ।’
एसपी घर्तीमगरले बाँके प्रहरी प्रमुखको जिम्मेवारी सम्हालेदेखि लागु औषध कारोवारी, भरिया र प्रयोगकर्ता दैनिकजसो पक्राउ पर्न थालेका छन् । सादा पोशाकमा प्रहरी परिचालन गरि कारोवारी, भरिया र प्रयोगकर्ताको खोजी भइरहेको उनले बताए । ‘लागु औषध ओसार पसार र प्रयोग गर्नेहरुको खोजी गर्न प्रहरी परिचालन गरिएको छ । नाकामा रहेका प्रहरी युनिटलाई पनि लागु औषध नियन्त्रणमा सक्रिय भएर लाग्न निर्देशन भएको छ,’ उनले भने ।
उनले लुम्विनी प्रदेशको लागु औषध ब्यूरोको टोलीसँग समन्वय गरेर लागु औषध नियन्त्रणको काम भइरहेको जानकारी दिए । उनका अनुसार, बैशाखमा १४ र जेठमा ३२ गरि ४६ जना लागु औषधमा संलग्न ब्यक्ति पक्राउ परेका छन् । यी मध्ये ५ जना महिला छन् । ‘लागु औषधसहित पक्राउ परेका मध्ये ३० जना विरुद्ध मुद्धा दर्ता गरि कानुनी कारवाही अगाडी बढाइएको छ,’ एसपी घर्तीमगरले भने ।
दुई महिनाको अवधिमा बाँके प्रहरीले ३५५ ग्राम ३०२ मिलिग्राम ब्राउन सुगर बरामद गरेको छ । बैशाखमा ५५ ग्राम ६३२ मिलिग्राम र जेठ महिनामा २९९ ग्राम ५४० मिलिग्राम ब्राउन सुगर बरामद भएको उनले बताए ।
त्यसैगरी, बाँके प्रहरीले ३ ग्राम ७६० मिलिग्राम चरेश, १११ किलो गाँजा, ६ लिटर ३ सय मिलिलिटर कोरेक्स र १२० ट्याब्लेट नाइट्रोजेपाम बरामद गरेको छ । ‘लागु औषध नियन्त्रण बाँके प्रहरीको उच्च प्राथमिकतामा छ । कारोवारी, भरिया र प्रयोगकर्ताको पहिचान गरि पक्राउ गर्ने योजना छ,’ एसपी घर्तीमगरले भने, ‘पहिले पहिचान गर्छौँ र त्यसपछि धमाधम पक्राउ गर्छौँ । अहिले पहिचान गर्ने काम भइरहेको छ ।’
बाँके प्रहरीले लागु औषधमा संलग्न ब्यक्तिलाई धमाधम पक्राउ गर्न थालेपछि जिल्ला प्रहरी कार्यालय बाँकेको थुनुवा कोठा भरिएको छ । ‘थुनुवा कोठमा भएका अधिकांश लागु औषधमा संलग्न थुनुवा छन् । यसैगरी पक्राउ गर्दै जाने हो भने राख्ने ठाउँ अभाव हुने देखिन्छ,’ उनले भने ।
Discussion about this post