बाँके असार ९ गते ।
राप्तीसोनारी गाउँपालिका ७ खल्ला झगडियामा बर्षायाम सुरु भएसँगै स्थानीयहरु त्रसिद भएका छन् । राप्ती नदीमा आउने बाढी र डुवानले बर्षौदेखि पीडित यहाँका नागरिकहरु रातमा ढुक्क भएर निदाउन पाउँदैनन् । झरी वर्षिन थालेपछि उनीहरुको आँखाबाट पनि झरी वर्षिन थाल्छ । खल्ला झगडिया गाउँलाई जोगाउन राज्य नलागेको होइन् । तर प्रभावकारी देखिएन ।
दुई वर्ष अघि राप्ती नदिमा आएको बाढीले खल्ला झगडियास्थित तट्बन्ध भत्काएको थियो । कटान रोक्न गत वर्षको असार–साउनमा बाँस र बोराको अस्थायी तट्बन्ध बनाइए पनि उक्त तट्बन्ध पनि बाढीले बगाएको छ । यस वर्ष पनि सोही ठाउँमा बाँसको तट्बन्ध निर्माण भइरहेको छ । दीर्घकालिन समस्या समाधानका लागि सरकारले कुनै चासो नदिएको बिश्राम थारुले गुनासो सुनाउँछन् ।
बाँसको तट्बन्धले बाढीको बहाव थेग्न नसक्ने उनको भनाइ छ । बाँसको तट्बन्ध बनाएर सरकारले निमुखा जनताको आँखामा छारो हाल्ने काम गरेको उनी बताउँछन् ।
राप्ती नदीमा पक्की तटबन्ध नभएसम्म वस्ती जोगाउन मुश्किल हुने उनको भनाइ छ । राज्यले बर्षा लागेपछि मात्रै तटबन्धको काम गर्ने गरेको भन्दै उनले आक्रोश पोखे । यस्ता काम मंसिर पुषमै गर्नुपर्ने उनको भनाइ छ । हिंजोआज गरिने काम बाढीले भेलसँगै बग्ने भन्दै उनले लगानीको उपयोगीता बारे समेत प्रश्न गरेका छन् ।
बाढीले कटान गरेको तट्बन्ध हेर्न राष्ट्रपति, पूर्व प्रधानमन्त्री, बहालवाला मन्त्री र सांसदको टोली यो ठाउँमा पुग्छन् र पक्की तट्बन्धको लागि बजेट विनियोजन गर्ने आश्वासन दिएर फर्किन्छन् । तर, राज्यको उच्च तहमा बसेकाहरुले दिएको आश्वासन राप्ती नदिको पानीसँगै बगेर जाने गरेको छ ।
आश्वासन मात्र दिने नेतालाई ८४ को चुनावमा देखाई दिने अर्का स्थानीय पीडित दुर्गा प्रसाद पाण्डेको चेतावनी छ । उनले आफ्नो समस्या भन्दा भन्दै थाकिसकेको बताए । सत्तामा हुँदा वास्ता नगर्ने र सत्ता वाहिर हुँदा आश्वसन दिने गरेको भन्दै त्यस नेताको हिसावकिताव अव ८४ मा हुने उनले बताए ।
खल्ला झगडियास्थित राप्ती नदिको तट्बन्ध काट्न अव एक मिटरमात्र बाँकी छ । यो तट्बन्ध बाढीले काटेमा राप्तीसोनारी गाउँपालिका ७ र नरैनापुर गाउँपालिकाको आधा भागमा क्षति पुग्ने भएको छ । बेलैमा ध्यान नदिए सयौँ परिवार बाढीबाट प्रभावित हुने भएका छन् । यस्तो अवस्थामा समेत राज्यले कुनै चासो नदिएको स्थानीयको गुनासो छ ।
भिडियो पनि हेर्नुहोस्
Discussion about this post