बाँके चैत १९ गते ।
भेरी अस्पतालमा सञ्चालन भइरहेको सिफलिस (भिरिङ्गी) सम्बन्धी वैज्ञानिक अनुसन्धानले तीन महिनाको अवधिमा महत्वपूर्ण तथ्यांक संकलन गरेको छ। छाला तथा यौन रोग विशेषज्ञ डा. बद्री चापागाईँको नेतृत्वमा सञ्चालन भइरहेको ‘VENUS अध्ययन २०२६’ अन्तर्गत ३२५ अस्पताल भिजिटको विवरण संकलन गरिएको हो।
अध्ययनका क्रममा १८७ जना नयाँ सिफलिस संक्रमित (युनिक केस) बिरामी पहिचान भएका छन्। अस्पतालका अनुसार तीमध्ये केहीलाई तत्काल उपचार आवश्यक देखिएको छ भने केही यसअघि उपचार गराइसकेका बिरामीसमेत रहेका छन्।
संकलित तथ्यांकले मुख्यतः २० देखि ४० वर्ष उमेर समूहका युवा बढी प्रभावित रहेको देखाएको छ। साथै, जन्मजात संक्रमण भएका शिशुदेखि ६५ वर्षसम्मका व्यक्तिमा समेत संक्रमण पुष्टि भएको उल्लेख गरिएको छ। केही अवस्थामा आमाबाट बच्चामा संक्रमण सरेको (कन्जेनिटल ट्रान्समिसन) समेत फेला परेको अध्ययनले देखाएको छ।
वैदेशिक रोजगारीका लागि गरिने अनिवार्य स्वास्थ्य परीक्षणका क्रममा ‘अनफिट’ ठहरिने सिफलिस संक्रमितको संख्या पनि उल्लेख्य रहेको पाइएको छ। यौनांगमा घाउ भएका १० भन्दा बढी बिरामी रेकर्डमा समावेश छन् भने करिब ३० प्रतिशत बिरामी पुरानो संक्रमण निको भए वा नभएको परीक्षण गराउन अस्पताल पुगेका छन्।
सेवा प्रवाहलाई थप प्रभावकारी बनाउन भेरी अस्पतालले छाला तथा यौन रोग विभागअन्तर्गत ‘भेनस कर्नर’ स्थापना गरेको जनाएको छ। अस्पतालका अनुसार उक्त कर्नरबाट सिफलिससम्बन्धी परामर्श, परीक्षण तथा उपचार सेवा सुरक्षित, गोप्य र व्यवस्थित रूपमा कोठा नं. २२ बाट निःशुल्क उपलब्ध गराइएको छ।
डा. चापागाईँका अनुसार सिफलिस सामाजिक व्यवहार, वैदेशिक रोजगारी, औषधिको अनियन्त्रित प्रयोग तथा नीतिगत कमजोरीसँग जोडिएको जटिल सार्वजनिक स्वास्थ्य समस्या हो। अध्ययनले उपचार प्रक्रियामा देखिएका चुनौती, स्वास्थ्यकर्मीमा रहेका भ्रम तथा बिरामीले भोग्ने सामाजिक लाञ्छनाबारे तथ्यगत जानकारी दिने अपेक्षा गरिएको छ।
अध्ययनबाट प्राप्त निष्कर्षले भविष्यमा राष्ट्रिय यौनजन्य रोग (एसटिआई) मार्गनिर्देशन तथा वैदेशिक रोजगारीसम्बन्धी स्वास्थ्य नीतिमा सुधारका लागि आधार तयार गर्ने विश्वास लिइएको छ।
भेरी अस्पतालमा २०२६ जनवरी १ देखि सुरु भएको यो अध्ययन डिसेम्बर अन्तिमसम्म सञ्चालन हुने जनाइएको छ।
Discussion about this post