बाँके चैत १६ गते ।
भारतमा कोरोना संक्रमण बढेसँगै नेपालमा पनि सतर्कता बढाएको देखिएको छ । तर, नेपालगञ्जको जमुनाह नाकामा स्थापना गरिएको कोरोना परीक्षण गर्न हेल्थडेस्क प्रभावकारी हुन सकेको छैन ।
इन्फाईड थर्मोमिटरको माध्यमबाट विरामीको तापक्रम मापन गर्ने भनिएपनि उक्त हेल्थडेक्स दिउसै बन्द हुने गरेको देखिएको छ । यसले भारतबाट फर्कने आम नेपाली स्वास्थ्य परिक्षण हुनबाट बन्चित भइरहेका छन ।
खोजखबरले गरेको निगरानीका क्रममा जमुनाहमा रहेको उक्त हेल्थ डेक्स दिउसै ४ बजेदेखि पूर्ण रूपमा बन्द भएको भेटिएको थियो ।
जुन ठाउँमा भारतबाट सयौं नागरिकहरू नेपाल तर्फ आइरहेका थिए । तर, हेल्थडेक्सको भवनमा ताल लगाइएका कारण स्वास्थ्य परिक्षण वा कुनै परामर्श हुन सकेको थिए ।
खुल्ला सीमाका कारण दैनिक हजारौंको ओहोरदोहोर हुने गरेको जमुनाह प्रहरी इन्चार्ज बिष्णु गिरी बताउँछन । उनकाअनुसार हेल्थडेक्समा कर्मचारीको अभावसँगै यसको उचित व्यवस्थापनमा तत्काल सोच्नुपर्ने देखिएको छ ।
हेल्थ डेक्समात्रै होइन हेल्प डेक्स समेत कर्मचारी विहीन छन । केही दिनअघि भारतबाट आएका दुई जना नेपालीमा कोरोना संक्रमण देखिएको थियो ।
दोस्रो चरणमा पनि बाँके र यसको सदरमुकाम नेपालगन्ज एकदमै जोखिममा देखिएका छन । तर, स्वास्थ्य कार्यालयको उदासीनता जिल्ला कोभिड विपद व्यवस्थापन समितिको लापरवाही र स्थानीय तहको वेचासोका कारण समस्या बढ्दै गएको छ ।
केही दिन अघि कोभिड व्यवस्थापन समितिको पहलमा नेपालगन्ज उपमहानगरपालिकाको स्वास्थ्य शाखा र स्वास्थ्य कार्यालयको समन्वयमा स्थापना गरिएको उक्त हेल्थ डेक्समा कर्मचारी अभाव हुँदा समस्या भएको स्वास्थ्य कार्यलयका अधिकृत मानव नेपाली बताउँछन ।
आबश्यकता अनुसारका कर्मचारी व्यवस्थापनमा जिल्ला कोभिड विपद व्यवस्थापन समिति नै उदासीन रहेको देखिएको स्वास्थ्य कार्यालय बताउँछ ।
बिरामी परेकालाई निगरानीमा राखेर स्वास्थ्य जाँच गछौं नाकाबाट ओहोरदोहोर गर्ने सबैको स्वास्थ्य जाँच गर्न सकिएको छैन उपमहानगरपालिकाको स्वास्थ्य शाखा संयोजक रामबहादुर चन्दले भने, ‘सबैलाई स्वास्थ्य परीक्षण गर्ने हो भने अहिलेको पूर्वाधार र जनशक्ति कम हुने देखिएको छ ।’
जमुनाह नाकाबाट स्थलमार्ग हुँदै ओहोरदोहोर हुने मानिसको स्वास्थ्य परीक्षण गर्नका लागि ठूलै व्यवस्थापनको खाँचो रहेको उनी बताउँछन ।
Discussion about this post