काठमाडौं असार २६ गते ।
सरकारले यस वर्ष पनि डेङ्गीले महामारीको रूप लिन सक्ने जोखिम रहेको बताएको छ । डेङ्गी सङ्क्रमण रोकथाम तथा नियन्त्रण विषयमा इपिडिमियोलोजी तथा रोग नियन्त्रण महाशाखा (ईडीसीडी) ले आयोजना गरेको अन्तरक्रियामा निर्देशक डा. रुद्र मरासिनीले यो वर्ष पनि ढुक्क भएर बस्ने अवस्था नरहेको बताउनुभयो ।
ईडीसीडीको तथ्याङ्कअनुसार जनवरी १ देखि अहिलेसम्म ६६ जिल्लामा सङ्क्रमण देखिएको छ । जसमा एक हजार एक सय ९२ जनामा सङ्क्रमण पुष्टि भएको छ । सबैभन्दा धेरै दार्चुला, धादिङ र सुनसरीमा सङ्क्रमित भेटिएका छन् । कतिपय सङ्क्रमणका बारेमा पहिचान तथा रिपोर्ट नभएकाले पनि सङ्क्रमण अझ फैलिएको हुन सक्ने ईडीसीडीको अनुमान छ ।
जुनदेखि अगस्टलाई डेङ्गीले महामारीको रूप लिन सक्ने समय मानिन्छ । मनसुनपछिको समयमा डेङ्गी सङ्क्रमण बढ्न सुरु हुन्छ । तर गएको वर्ष मङ्सिरमा पनि डेङ्गी सङ्क्रमण हुने क्रम उच्च थियो । गएको वर्ष ५४ हजार सात सय ८४ जनामा डेङ्गी सङ्क्रमण हुँदा ८८ जनाको ज्यान गएको थियो ।
शुक्रराज ट्रपिकल तथा सरुवा रोग अस्पतालका प्रमुख कन्सल्टेन्ट फिजिसियन डा. विमल शर्मा चालिसेले अहिलेसम्मको अवस्था हेर्दा महामारी फैलिन नसक्ने देखिए पनि तयारी कम गर्न नहुने बताउनुभयो ।
Discussion about this post