बाँके असोज ४ गते ।
नेपालगन्ज उद्योग बाणिज्य संघले नेपालगन्ज नाकाबाट हुने अवैध ओसार पसार नियन्त्रणका लागि पहल गरिदिन आग्रह गरेको छ ।
नेपालगन्जमा आयोजित अन्तरक्रिया कार्यक्रममा मन्त्री रिजाललाई ११ वुँदे ज्ञापन पत्र बुझाउँदै नेपालगन्ज उद्योग बाणिज्य संघले नेपालगन्जसँग सीमा जोडिएका भारतीय बजारमा सामान किनमेलमा गर्ने क्रम बढेपछि नेपालगन्जको ब्यापार ब्यवसाय ठप्प भएको भन्दै कडाई गर्न माग गरेको अध्यक्ष टंकबहादुर धामीले बताए ।
उनले अब्यवहारिक भन्सार नीतिलाई सच्याउन र सीमा नाका ब्यवस्थित गर्न माग गरेको मन्त्री समक्ष गरेको जानकारी दिए । ‘नेपालगन्ज नाका भएर दैनिक १२ हजार पाँच सय जना भारतीय बजारमा किनमेल गर्न गएको तथ्यांक छ । ति ब्यक्तिले १५ सयदेखि ३० हजार रुपैयाँसम्मको किनमेल गरेको सर्वेक्षणले देखाएको छ,’ ज्ञापन पत्रमा उल्लेख छ ।
सो अवसरमा संघले नौवस्ता औद्योगिक क्षेत्रलाई यथाशक्य जाँडो संचालनमा ल्याउन माग गरेको थियो ।
सरकारले घोषणा गरेको लामो समय वित्दासमेत कार्यान्वयनमा नआउनु दुखद भएको प्रथम उपाध्यक्ष चिरन्जीवि ओलीले बताए ।
ओलीले नौवस्ता औद्योगिक क्षेत्रको काम पाँच वर्षमा ५ प्रतिशतमात्र भएको उल्लेख गरे । उनले भने, ‘औद्योगिक क्षेत्रका बुट्यान फडानी गर्ने र जग्गा अधिग्रहण गर्ने बाहेक अन्य काम हुन सकेको छैन । घोषणा र शिलान्यास बाहेक अरु काम अगाडी बढ्न नसक्नु दुर्भाग्य हो ।’
जडिबुटी ब्यवसायी रविन्द्रकुमार शुक्लले सरकारका कारण यस क्षेत्रका २० वटा जडिबुटी उद्योग बन्द भएको बताए । उनले कानुन संशोधन गरि बन्द भएका उद्योग संचालन गर्ने बातावरण बनाउन मन्त्री रिजालसँग आग्रह गरे ।
नेपालगन्ज उद्योग बाणिज्य संघका निवर्तमान अध्यक्ष समेत रहेका नेपाल उद्योग बाणिज्य महासंघका केन्द्रिय सदस्य अब्दुल वाहिद मन्सुरीले खुल्ला सीमानाकाका कारण नेपालगन्जका उद्योगी, ब्यवसायी अनेक थरि समस्या झेल्न परेको जानकारी दिए ।
नेपालगन्जका उद्योगी, ब्यापारीको कुरा सुनिसकेपछि मन्त्री रिजालले नौवस्ता औद्योगिक क्षेत्र संचालनका लागि सरकारले तयारी थालेको बताए । उनले नौवस्ता औद्योगिक क्षेत्र संचालनका लागि सरकारले गृह कार्य थालेको बताउँदै निराश नहुन आश्वासन दिए ।
औद्योगिक क्षेत्र विस्तारका लागि सरकार सम्बेदनशिल भएर लागेको बताउँदै उनले उद्योगी, ब्यवसायीको हितका लागि सरकार गम्भिर रहेको बताए । ‘उद्योग, ब्यवासाय चलायमान भएन भन्ने चिन्ता लिनु स्वभाविक हो । तर, निराश हुनुपर्ने अवस्था छैन । उद्योगी, ब्यवसायीको साथमा सरकार छ । चिन्ता नलिनु होला,’ उनले भने ।
Discussion about this post