बाँके कात्तिक १८ गते ।
भूकम्पमा परी घाइते भएका जाजरकोटका एक जना घाइतेलाई थप उपचारका लागि नेपालगन्ज ल्याइएको छ ।
जाजरकोट भेरी नगरपालिका वडा नम्बर ३ खलंगा निवासी ४८ वर्षीय बिमलकुमार कार्कीलाई एम्बुलेन्समार्फत नेपालगन्ज ल्याइएको हो ।
उनको भेरी अस्पताल नेपालगन्जमा उपचार सुरु गरिएको छ ।बाँकेका प्रमुख जिल्ला अधिकारी श्रवणकुमार पोखरेलले घाइते कार्की एम्बुलेन्समार्फत नेपालगन्ज आईपुगेको बताए । भूकम्पबाट घाइते भएका ब्यक्तीको उपचार गर्न भेरी अस्पतालमा विशेष ब्यवस्था मिलाइएको प्रजिअ पोखरेलले बताए ।
‘अहिलेलाई हामीले भेरी अस्पतालमा घाइतेको उपचार गर्ने ब्यवस्था मिलाएका छौं, आवश्यकता अनुसार पछि अन्य अस्पतालमा पनि ब्यवस्थापन गर्न सकिन्छ,’ उनले भने । घाइते कार्की राती ३ बजेतिर जाजरकोटबाट नेपालगन्जका लागि प्रस्थान गरेका थिए ।
जाजरकोट र रुकुम पश्चिमका अन्य घाइतेलाई पनि एम्बुलेन्स र हेलिकप्टरमार्फत नेपालगन्ज ल्याउने तयारी भइरहेको प्रजिअ पोखरेलले बताए । भेरी अस्पताल विकास समितिका अध्यक्ष बीरेन्द्र शाहले भूकम्पका घाइतेको उपचार ब्यवस्था मिलाइएको बताए । अस्पतालको नयाँ भवनको भूईतलामा उपचार गर्न आवश्यक ब्यवस्था मिलाइएको अध्यक्ष शाहले जानकारी दिए । स्वास्थ्य कार्यालय बाँकेका अधिकृत नरेश श्रेष्ठले घाइतेको उपचार गर्न पूर्ण रुपमा ब्यवस्थापन गरिएको बताए ।
Discussion about this post