बाँके कात्तिक २१ गते ।
नेपालको बजार भन्दा केहि सस्तो मुल्यमा सामान पाइने भएपछि गरिवीको रेखामुनी रहेका नागरिक किनमेलाका लागि सीमावर्ती बजार रुपैडिहा पुग्छन् ।
सर्वसाधारण नागरिकलाई रुपैडिहा जाने रहर होइन बाध्यता हो ।
आर्थिक मन्दी र गरिवीका कारण उनीहरु किनमेलका लागि रुपैडिहा जान बाध्य भएका हुन्, तर नेपालगन्ज नाकामा खटिएका सशस्त्र प्रहरीले ति गरिव र असहाय नागरिकलाई पीडामाथि पीडा थप्ने गरेका छन् ।
मोटो रकम लिएर तस्करहरुसँग पैँसा लिएको सशस्त्र प्रहरीले गरिव र निमुखा नागरिकको सामान खोसिरहँदा तस्कर र सेटिङ मिलाएकाहरु ठूलो परिमाणको सामान भन्सार नगराएर खुलेआम नेपालगन्ज आउने गरेको प्रत्यक्षदर्शी बताउँछन् ।
‘गरिव र निमुखालाई मात्र सशस्त्र प्रहरीको नियम, कानुन लाग्छ । पैँसा दिने र धनी तथा पहुँच हुनेहरु ठूलो परिमाणको सामान दिनदहाडै नेपालगन्ज पुर्याउँछन्,’ एक प्रत्यक्षदर्शीले भने ।
भन्सार सुरक्षा तथा अवैध चोरी पैठारी नियन्त्रणका लागि खटिएका सशस्त्र प्रहरी नै अवैध असुलीमा लागेपछि राजस्व संकलनमा समेत असर परेको छ ।
उनीहरु थोरै सामान जफत गरेको देखाउँदै सर्वसाधारण र प्रशासनको आँखामा छारो हालिरहेको पुष्टि भएको छ ।
थोरै सामान ल्याउनेलाई कडाई गरेको देखाउनु भनेको हात्तीको खाने दाँत र चपाउने दाँत जस्तै हो,’ एक सर्वसाधारणले नाम नबताउने शर्तमा भने, ‘सशस्त्र प्रहरीले बाहिर गर्ने र भित्री रुपमा गर्ने ब्यवहार फरक छ । सर्वसाधारणलाई त्रसाएर भित्रभित्रै तस्करसँग कमिशन खाइरहेको छ ।’
बाँकेका प्रमुख जिल्ला अधिकारी श्रवणकुमार पोखरेलले अनेकथरि कुरा फेसबुक पेजमा लेख्ने सिवाय नाका ब्यवस्थापनका लागि केहि गर्न नसकेको सर्वसाधारणको गुनासो छ ।
सशस्त्र प्रहरीले सामान जाँचबुझको नाममा सर्वसाधारणलाई सास्ती दिँदासमेत सिडिओे पोखरेलले नाका ब्यवस्थापनमा चुकेका छन् । मिडियामा छाउन रुचाउने उनी जिल्ला प्रशासन कार्यालय बाँकेको फेसबुक बनाएर मिडियाबाजीमै सिमित भएका छन् ।
‘सिडिओको ध्यान नाका ब्यवस्थापन र सहज आउजाउ गराउने भन्दा सानातिना कुरा फेसबुकमा लेखेर मिडियाबाजी गरिरहनु भएको छ,’ सर्वसाधारण भन्छन्, ‘सिडिओले फेसबुकमा लेख्ने होइन । एक्सनमा आएर जिल्लावासीलाई शान्ति, सुरक्षा र अमनचयन दिने हो ।
दैनिक सयौँ सर्वसाधारणले नाकामा दुखा पाउँदासमेत मौन बस्नु भनेको उहाँ जनता प्रति समवेदनशिल हुनुहुन्न भन्ने प्रष्ट हुन्छ ।’
बाँकेको प्रमुख जिल्ला अधिकारीको रुपमा आएदेखि अरु कामभन्दा फेसबुकमा सुचना राख्नमै उनी ब्यस्त छन् ।
‘नाकामा सर्वसाधारणले किन र कस्तो सास्ती ब्यहोरिरहेका छन् भन्ने सिडिओले बुझ्न र सहज आउजाउ बनाउन आवश्यक छ,’ एक स्थानीयले अनलाइन खोजखवरलाई भने, ‘सशस्त्र प्रहरीको यस्तै दादागिरि रहिरह्यो भने कुनै दिन विस्फोट हुन सक्छ । त्यसको सम्पूर्ण दोष प्रमुख जिल्ला अधिकारीलाई जाने छ ।
Discussion about this post