फाइल फोटो
जावेद अन्सारी
बाँके असार १६ गते ।
कोरोनाको इपिसेन्टर बनेको बाँके जिल्ला कोरानाबाट मुक्त हुन थालेको छ । पछिल्ला दिनमा कोरोनाका संक्रमितहरु थपिनेक्रम रोकिएको छ भने ३५२ संक्रमितमध्ये ३२० जना निको भएर घर फर्किएका छन् । जेठको अन्तिमसम्म भरीभराउ क्वारेन्टिन रित्तिएका छन् । क्वारेन्टिनहरु खाली हुँदै गएको र आइसोलेशनमा रहेका विरामीहरु निको भएर घर फर्किन थालेपछि बाँकेलाई कोरोनामुक्त जिल्ला घोषणा गर्ने तयारी थालिएको छ ।
जिल्लामा कोरोना भाइरस संक्रमितहरु उल्लेख्य मात्रामा नभेटिनु र जिल्लाका विभिन्न आइसोलेसनमा रहेका कोरोना संक्रमितहरु निको भएर घर फर्किनेक्रम बढेसँगै संक्रमितको संख्या न्यून भएपछि बाँकेलाई कोरोना भाइरसमुक्त जिल्ला घोषणाको तयारी थालिएको बाँकेका सिडिओ रामबहादुर कुरुम्वाङले जानकारी दिनुभयो ।
बाँकेमा पहिलो पटक गत वैशाख १९ गते नेपालगन्ज उपमहानगरपालिका ७ का ६० वर्षिय बृद्धमा कोरोना संक्रमण देखिएको थियो । जिल्लामा पहिलो पटक कोरोना संक्रमण देखिएको करिब दुई महिनाभित्र बाँके जिल्लालाई कोरोनामुक्त जिल्ला घोषणा गर्ने थालिएकोे हो । बाँकेमा हालसम्म कोरोना भाइरसका ३५२ जना संक्रमित मध्ये ३१४ जना निको भएर घर फर्किसकेको जिल्ला स्वास्थ्य कार्यालय बाँकेका कोरोना फोकल पर्सन नरेश श्रेष्ठले जानकारी दिनुभयो ।
क्वारेन्टिन अवधि पूरा गरी भारतलगायत अन्य मुलुकबाट आएकाहरु घर फिर्ता भएसँगै अधिकांश क्वारेन्टिन समेत रित्ता भएका छन् । बाँकेका आठ वटा स्थानीय तहमा सन्चालनमा रहेका ११४ क्वारेन्टिनमध्ये ७० क्वारेन्टिन खाली भएको श्रेष्ठले बताउनुभयो । बाँकेमा हालसम्म १० हजार ६२४ जना क्वारेन्टिनमा बसेर घर फिर्ता भएका छन् भने अव ८१६ जना मात्र क्वारेन्टिनमा छन ।
हालसम्म क्वारेन्टिनमा रहेका आठ हजार ८४२ जनाको आरडिटी परीक्षण गरिएको र २६९ जनालाई आरडिटी परीक्षण नगरी घर पठाइएको छ । पिसिआरका लागि पछिल्लो पटक ६ हजार ७५१ जनाको स्वाब संकलन गरिएकोमा ६ हजार १८२ जनाको रिपोर्ट नेगेटिभ आएको फोकल पर्सन श्रेष्ठले बताउनुभयो ।
संकलन भएका स्वाबमध्ये २१९ वटा स्याम्पलको जाँच प्रक्रियामा रहेको छ । बाँकेमा मृत्यु भएका दुईजनामा कोरोना भाइरस संक्रमण पोजेटिभ देखिएको थियो ।
Discussion about this post