बाँके पुस १३ गते ।
नेपाल कम्युनिष्ट पार्टी नेकपाको प्रचण्ड–नेपाल समूहका नेता योगेश भट्टराईले प्रधानमन्त्री केपी शर्मा ओलीले अयोग्य र असक्षम भएपछि संसद् विघटन गरेको आरोप लगाउनुभएको छ । उहाँले अख्तियारको दुरुपयोग गरेर संसद् विघटन गरेको आरोप पनि लगाउनुभएको छ । प्रधानमन्त्रीले ऐतिहासिक महाभूल गरेको टिप्पणी गर्दै भट्टराईले आफू अयोग्य र असक्षम भएपछि संसद् विघटन गर्ने असंवैधानिक हर्कतका विरुद्ध संघर्ष भइरहेको बताउनुभयो ।
प्रेस संगठन नेपाल बाँकेले आज विहान नेपालगञ्जमा आयोजना गरेको पत्रकार सम्मेलनमा नेता भट्टराईले संविधानमा नभएको अधिकार प्रयोग गरी असंवैधानिक कदम चालेकाले आफूहरु संविधानको रक्षार्थ सडकमा आएको बताउनुभयो । विघटित प्रतिनिधिसभा पुनःस्थापनाको विकल्प नरहेको उहाँको भनाई छ । सर्वोच्च अदालतले संविधानको मर्म अनुसार नै फैसला गर्ने आफूहरुको विश्वास रहेको पूर्व मन्त्री समेत रहनुभएका भट्टराईले बताउनुभयो । आफूहरु नै आधिकारिक नेकपा भएको पनि उहाँको दाबी छ ।
Discussion about this post