बाँके पुस १३ गते ।
प्रमुख विपक्षी नेपाली कांग्रेसका नेता गगन थापाले प्रधानमन्त्रीको सनकको शिकार संसद भएको आरोप लगाउनुभएको छ । राष्ट्रपति पनि प्रधानमन्त्रीको अपराधको साक्षी मात्र नभएर साझेदार बनेको उहाँको आरोप छ । प्रधानमन्त्रीको सिफारिसमा राष्ट्रपतिले प्रतिनिधिसभा भंग गरेको विरोधमा काँग्रेसले देश व्यापी आयोजना गरेको विरोधसभा अन्तर्गत नेपालगन्जमा आयोजित बृहत विरोध सभामा थापाले सत्तारुढ नेपाल कम्युनिस्ट पार्टी नेकपाको झगडा र प्रधानमन्त्रीको अहंकारको शिकार संसद भएको बताउनुभयो ।
उहाँले भन्नुभयो, ‘हाम्रो दुर्भाग्य, नेपालले एउटा अयोग्य र असक्षम व्यक्तिलाई प्रधानमन्त्री आयो, जसको अहंकारको शिकार संसद र संविधान बनेको छ ।’ प्रधानमन्त्रीले संसद विघटन गर्नसक्ने व्यवस्था अहिलेको संविधानमा नभएको उहाँले बताउनुभयो। उहाँले ओलीले जनमतको अपमान गरेको आरोप लगाउनुभयो । संसदले प्रधानमन्त्री छान्न सकेन वा भएको प्रधानमन्त्रीले विश्वासको मत गुमाए मात्र संसद विघटनको अवस्था आउन सक्ने उहाँले बताउनुभयो।
यति स्पष्टसँग लेख्दालेख्दा प्रधानमन्त्री ओलीले गरेको संसद विघटनको सिफारिस राष्ट्रपतिले सदर गरेको भन्दै उहाँले भन्नुभयो, ‘राष्ट्रपति विद्यादेवी भण्डारी आजदेखि तपाई र मेरो राष्ट्रपति होइन, केपी शर्मा ओली ग्याङका एक सदस्य मात्र हुन् ।’ उहाँले कोरोना महामारीले तहसनहस भएको मुलुकको अर्थतन्त्र उकास्ने बेलामा सरकार त्यसको उल्टो बाटोमा हिडेको उहाँको भनाइ छ ।
Discussion about this post