बाँके चैत २० गते ।
केन्द्रमा पाँच दलिय गठबन्धन गर्ने निर्णय भएको छ, तर स्थानीय तहको निर्वाचनमा तालमेल हुने सम्भावना कम देखिएको छ ।
त्यसैमा नेपालगन्ज उपमहानगरमा गठबन्धनका सवै दलले आ–आफ्नो अडान कायम राखेपछि तालमेलको सम्भावना टर्दै गएको छ । स्थानीय तहको निर्वाचनमा आवश्यकता अनुसार तालमेल गर्ने निर्णय गरेको दुई दिन नबित्दै जनता समाजबादी पार्टी बाँके अध्यक्ष कमरुद्दिन राईले नेपालगन्जको मेयरमा उमेदवारी घोषणा गरेका छन् ।
उनले मेयर पदको उमेदवार घोषणा गरि प्रचार सामग्री समेत तयार पारेर सार्वजनिक गरेका छन् । अन्य स्थानीय तहमा जसपाले छोडे पनि नेपालगन्जमा कुनै पनि हालतमा छोड्न सकिन्न,’ उनले भने, ‘देशका अन्य स्थानीय तह अरुलाई दिए दिउन, तर नेपालगन्जको मेयर कुनै पनि हालतमा अरु दललाई दिन सकिन्न ।’
नेपालगन्जको मेयरका लागि जसपा धेरै अगाडी गइसकेको बताउँदै उनले पछाडी फर्किन नसक्ने स्पष्ट पारे ।
‘स्थानीय तहको अघिल्लो निर्वाचनको मत परिणाम आउने वित्तिकै मैले मेयरको लागि तयारी थालेको थिए । गठबन्धनको नाममा अरु दललाई नेपालगन्जको मेयरको टिकट दिन सक्ने अवस्था छैन,’ उनले भने ।
उनी मेयरको तयारी स्वरुप असहाय, अशक्त, विद्यार्थी, बालबालिका लगायतलाई सहयोग गर्दै आएका छन् ।
रातदिन नभनि जनताको घरदैलोमा खटिदै आएका अध्यक्ष कमरुद्दिनले पाँच बर्षको अवधिमा अधिकांश मतदाताको घरमा पुगेका छन् । ‘रात दिन नभनि जनताको सुख, दुखमा साथ दिँदै आएको छु, म मेयरमा उठेन भने जनताले मलाई सराप्ने छन्,’ उनले भने ।
उनले मेयरमा जित्ने आधार र विजयी भएपछि गर्ने प्रमुख कामको लिष्ट बनाइसकेका छन् । जनताको भावनालाई बुझेर भावी योजना बनाएको उनले बताए ।
‘मेयरमा जिते पछि पहिलो बर्ष के काम गर्ने, दोस्रो बर्ष के काम गर्ने भन्ने स्पष्ट खाका मसँग छ,’ उनले भने ।
राईको पार्टी जसपाले नेपालगन्जको उममेयरमा रमारानी बैश्यलाई उम्मेदवार बनाउने निश्चित भएको छ ।
बैश्य गत निर्वाचनमा राप्रपाबाट उपमेयर पदको उम्मेदवार थिइन् । उनले त्यतिबेला लोकप्रिय मत पाएकी थिइन् ।
उनले पनि उपमेयरको उम्मेदवारी घोषणा गरि प्रचार सामग्री बाहिर ल्याएकी छन् ।
Discussion about this post