नेपालगन्ज, जानकी, डुडुवा र नरैनापुरमा गठबन्धन आवश्यक छैनः राई

बाँके चैत २३ गते ।
अघिल्लो निर्वाचनमा जनता समाजवादी पार्टीका बाँके अध्यक्ष कमरुद्दिन राइ नेपालगन्ज उपमहानगरपालिकाको मेयर पदमा पराजित हुनुभयो ।

करिव पाँच हजार मत ल्याउनुभएका उहाँ चौथो स्थानमा आउनुभएको थियो ।
उहाँभन्दा धेरै नेकपा एमाले, नेकपा माओवादी केन्द्र र काँग्रेसका उम्मेदवारले मत ल्याए । १२ हजारबढी मत ल्याएर राप्रपाका धवलशम्शेर राणा मेयरमा निर्वाचित हुनुभयो ।

चुनावमा पराजय भएपछि कमरुद्दिन राइ निरन्तर जनताको घरदैलोमा पुगिरहेको बताउनुहुन्छ ।
त्यही भएर उहाँ फेरि मेयरमा उम्मेदवारी घोषणा गरेर चुनावी अभियानमा व्यस्त हुनुहुन्छ । पाँच वर्षसम्म यसरी चुनावी अभियानकै निमित्त जनताको घरदैलोमा व्यवस्त हुुनुभएका राइलाई भने आगामी निर्वाचनमा केन्द्रले गर्ने चुनावी गठबन्धनप्रति भने चित्त बुझेकोमात्र छैन त्यसको प्रतिवादमै उत्रनुभएको छ ।

सत्तारुढ नेपाली काँग्रेस, नेकपा माओवादी केन्द्र, नेकपा एकिकृत समाजवादी पार्टी, जनता समाजवादी पार्टी र राष्ट्रिय जनमोर्चाबीचको पाँच दलिय गठबन्धनले केन्द्रमा चुनावी गठबन्धन गरेर अघि बढ्ने निर्णय कार्यकर्ताको हित विपरीत भएको भन्दै उहाँले त्यसप्रति आपत्ती जनाउदै त्यही बेहोराको जानकारी सहितको पत्र केन्द्र र प्रदेशलाई जानकारी गराइएको राइले बताउनुभयो ।