बाँके भदौ १४ गते ।
स्वास्थ्य तथा जनसंख्या मन्त्री मोहन बहादुर बस्नेतले भेरी अस्पतालको निरीक्षण गर्नु भएको छ । कर्णाली प्रदेशको सुर्खेत र जुम्ला जाने क्रममा आज विहान नेपालगन्ज आउनुभएका मन्त्री बस्नेतले भेरी अस्पतालको निरीक्षण गर्नुभएको हो ।
उहाँले त्यसक्रममा अस्पतालको अवस्थाबारे जानकारी लिनुभएको छ ।अस्पतालका प्रमुख मेडिकल सुपरिन्डेन्डेन्ट डा.पवनजंग रायमाझीले अस्पतालको हालको अवस्था, सेवा प्रवाह, समस्या र चुनौतिबारे जानकारी गराउनुभएको थियो । डा.रायमाझीले जनशक्ति अभाव र पूर्वाधार अभावका कारण विरामीलाई प्रभावकारी सेवा प्रवाह गर्न नसकिएको भन्दै जनशक्ति र पूर्वाधारका निमित्त मन्त्रालयले सहयोग गर्नु पर्छ भन्नुभयो ।
उहाँले पूर्वाधार अभावका कारण अस्पतालको ओपिडीमा विरामीले घण्टौं समय लाइन लाग्नु पर्ने अवस्था भएको बताउनुभयो । त्यसक्रममा मन्त्री बस्नेतले पूर्वाधार र जनशक्ति अभाव भएपनि व्यवस्थापन गर्न नजान्दा समस्या बढी देखिएको प्रतिक्रिया दिनुभयो ।‘जनशक्ति र पूर्वाधार अभाव छ त्यो म मान्छु उहाँले भन्नुभयो–‘तर सामान्य भिडभाडलाई पनि व्यवस्थापन गर्न नसक्नु व्यवस्थापकीय कमजोरी हो ।’
उहाँले विरामीलाई उत्साहित गर्ने व्यवहार गर्न नसक्नु र अस्पतालको फोहोर समेत व्यवस्थापन गर्न नसक्नु व्यवस्थापकीय कमजोरी हो भन्नुभयो ।निरीक्षण कार्यक्रममा लुम्विनी प्रदेश सदस्यहरु बाद शाह कुर्मी, सञ्जु कुमारी थारु, मीना सिक्देल, माया पुन, सुशिला नेपाली, नेपालगन्जका मेयर प्रशान्त विष्ट, काँग्रेस बाँकेका सभापति नारयाण प्रसाद गौडेल लगायतको सहभागिता रहेको अस्पताल विकास समितिका अध्यक्ष वीरेन्द्र बहादुर शाहले जानकारी दिनुभयो ।
Discussion about this post