बाँके चैत १३ गते।
बाँके जिल्लाका ग्रामीण तथा सहरी क्षेत्रमा पछिल्लो समय मोतिविन्दुका बिरामीको सङ्ख्या वृद्धि हुँदै गएको पाइएको छ। जिल्लाका विभिन्न स्थानमा समय–समयमा सञ्चालन हुने निःशुल्क आँखा उपचार शिविरमा समेत मोतिविन्दुका बिरामीको उपस्थिति उल्लेख्य देखिएको छ।
नेपालगन्जस्थित फत्तेबाल आँखा अस्पतालका अनुसार, गत वर्ष बाँकेका विभिन्न पालिकामा सञ्चालन गरिएका निःशुल्क आँखा शिविरमा ठूलो सङ्ख्यामा मोतिविन्दुका बिरामी भेटिएका थिए। चालु वर्षमा पनि त्यस्ता बिरामीको सङ्ख्या बढ्दो क्रममा रहेको जनाइएको छ।
हाल कोहलपुर नगरपालिकामा सञ्चालन भइरहेको निःशुल्क आँखा जाँच शिविरमा पनि उल्लेख्य सङ्ख्यामा मोतिविन्दुका बिरामी फेला परेका छन्। तिलगङ्गा आँखा प्रतिष्ठान र कोहलपुर नगरपालिकाको संयुक्त आयोजनामा तीन दिनसम्म सञ्चालन गरिएको उक्त शिविरमा ८९५ जनाले सेवा लिएका थिए। तीमध्ये १६९ जना बिरामीलाई मोतिविन्दुको शल्यक्रियाका लागि छनोट गरिएको कोहलपुर नगरपालिकाका प्रमुख पूर्ण आचार्यले जानकारी दिएका छन्।
नगर स्वास्थ्य प्रवर्धन केन्द्र, अकलघरवा (वडा नं. १५) मा २६६ जनाले आँखा जाँच गराएका थिए, जसमा १७७ महिला र ८९ पुरुष रहेका थिए। त्यसमध्ये ४२ जनालाई शल्यक्रियाका लागि छनोट गरिएको छ।
त्यसैगरी, वडा नं. ४ स्थित रझेना स्वास्थ्य चौकीमा ३५५ जनाले सेवा लिएका थिए। यसमध्ये २२५ महिला र १३० पुरुष रहेका थिए भने ६९ जनालाई शल्यक्रियाका लागि छनोट गरिएको छ।
वडा नं. २ स्थित आधारभूत स्वास्थ्य सेवा केन्द्रमा २७४ जनाले सेवा लिएका थिए, जसमा १६७ महिला र १०७ पुरुष रहेका थिए। यहाँबाट ५८ जनालाई मोतिविन्दुको शल्यक्रियाका लागि छनोट गरिएको छ।
नगर प्रमुख आचार्यका अनुसार, यस्ता निःशुल्क आँखा शिविरहरूले ग्रामीण तथा सहरी क्षेत्रका आँखासम्बन्धी समस्याबाट पीडित नागरिकलाई सेवा प्रदान गर्नुका साथै उपचारको पहुँच विस्तार गर्न महत्वपूर्ण योगदान पु¥याउने अपेक्षा गरिएको छ।
कोहलपुरमा सञ्चालन भइरहेको निःशुल्क आँखा शिविर आगामी चैत १५ गतेसम्म जारी रहने छ। शल्यक्रियाका लागि छनोट भएका बिरामीहरूको अपरेसन चैत १६, १७ र १८ गते कोहलपुर नगर अस्पतालमा निःशुल्क रूपमा गरिने जनाइएको छ।
Discussion about this post