काठमाडौं चैत १३ गते ।
रास्वपा संसदीय दलका नेता बालेन्द्र शाह (बालेन)ले प्रधानमन्त्री पदको शपथ ग्रहण गरेका छन् । राष्ट्रपति रामचन्द्र पौडेलले शीतल निवासमा आयोजित विशेष समारोहबीच ३६ वर्षीय शाहलाई पद तथा गोपनीयताको शपथ गराएका हुन् ।
यसअघि राष्ट्रपति पौडेलले नेपालको संविधानको धारा ७६(१) अनुसार प्रतिनिधिसभामा बहुमत प्राप्त दलको नेताका रूपमा शाहलाई प्रधानमन्त्री नियुक्त गरेका थिए । संविधान जारी भएपछि सो धाराअनुसार बहुमतको सरकार गठन गरी प्रधानमन्त्री नियुक्त भएको यो पहिलो पटक भएको बताइएको छ ।
नवीन पुस्तामाझ लोकप्रिय मानिने शाह पहिलोपटक संसद् प्रवेश गरेलगत्तै देशको कार्यकारी नेतृत्व सम्हाल्ने स्थानमा पुगेका हुन् । काठमाडौं महानगरपालिकाको मेयर पदबाट राजीनामा दिएर फागुन २१ मा सम्पन्न प्रतिनिधिसभा निर्वाचनमा भाग लिएका उनले झापा क्षेत्र नम्बर ५ बाट उम्मेदवारी दिएका थिए । उक्त निर्वाचनमा उनले पूर्वप्रधानमन्त्री केपी शर्मा ओलीलाई करिब ५० हजार मतान्तरले पराजित गर्दै प्रतिनिधिसभा सदस्यमा निर्वाचित भएका थिए ।
शाहको उदयलाई नेपाली राजनीतिमा नयाँ पुस्ताको हस्तक्षेप र परिवर्तनको संकेतका रूपमा हेरिएको छ । इन्जिनियर पृष्ठभूमिका शाह केही वर्षअघिसम्म ¥यापरका रूपमा चिनिन्थे भने २०७९ सालको स्थानीय तह निर्वाचनमा स्वतन्त्र उम्मेदवारका रूपमा काठमाडौं महानगरपालिकाको मेयरमा विजयी भएपछि राष्ट्रिय राजनीतिमा उनको प्रभाव तीव्र रूपमा बढेको थियो ।
काठमाडौंमा जन्मिएका शाहले सिभिल इन्जिनियरिङमा स्नातक तथा भारतबाट स्ट्रक्चरल इन्जिनियरिङमा स्नातकोत्तर अध्ययन गरेका छन् ।
यससँगै शाह नेतृत्वको नयाँ सरकारप्रति आम नागरिकले उच्च अपेक्षा राखेका छन् । सुशासन, विकास र सेवा प्रवाहमा सुधार ल्याउने वाचा गर्दै आएका शाहले अब ती प्रतिबद्धता कार्यान्वयन गर्ने चुनौती सामना गर्नुपर्नेछ ।
Discussion about this post