बाँके असोज ११ गते ।
लुम्बिनी प्रदेशका मुख्यमन्त्री डिल्ली चौधरी मुस्लिम समुदायको महान पर्व ’मोहम्द डे’ को उत्सवमा सहभागी भएका छन् । नेपालगन्ज आईपुगेका मुख्यमन्त्री चौधरी बिहीबार बिहान मुस्लिम समुदायले निकालेको र्यालीमा सहभागी भएका हुन् ।
विपी चोकमा आयोजित विशेष कार्यक्रमलाई सम्बोधन गर्दै उनले सबै धर्मलाई सम्मान गर्नुपर्ने बताए । नेपाल बहुसाँस्कृतिक, बहुधार्मिक समुदाय बसोबास गर्ने मुलुक रहेको उनको भनाई छ । ‘मोहम्मद डे पवलाई मुस्लिम समुदायले मात्र नभएर सबै नेपालीले गर्व गर्नुपर्छ, लुम्बिनी प्रदेश सरकारको तर्फबाट शुभकामना दिन म यहाँ आएको हुँ,’ उनले भने ।
यस्तै पुर्वमन्त्री मोहम्मद इस्तियाक राईले नेपालगन्जको धार्मिक तथा सामाजिक सद्भाव देशमै गर्व गर्न लायक भएको बताए । आगामी दिनमा पनि धार्मिक तथा सामाजिक सद्भाव कायम राखेर अगाडी बढ्नुपर्ने पुर्वमन्त्री राईको भनाई छ ।
नेपालगन्जमा धार्मिक सद्भाव कायम राख्नमा धर्मगुरुको भूमिका महत्वपूर्ण रहेको उनले बताए ।
बागेश्वरी मन्दिरका मुल महन्त चन्दननाथ योगीले मोहम्मद डे को शुभकामना दिदै भने, ‘यो खुसीयालीको पर्व हो, सबैमा खुसीयाली छाओस्, सबैमा राम्रो होस् ।’ सो क्रममा पुर्वमन्त्री गजेन्द्रबहादुर हमाल, लुम्बिनी प्रदेशकी सांसद अम्बिका काफ्ले, संविधान सभा सदस्य एवम् मुस्लिम अगुवा अब्दुल हमिद सिद्धिकी भोला, नेपालगन्ज उपमहानगरपालिकाका मेयर प्रशान्त विष्ट, कोहलपुर नगरपालिकाका मेयर पूर्णप्रसाद आचार्य, नेपालगन्ज उपमहानगरपालिकाका उपमेयर कमरुद्धिन राई, बाँकेका प्रमुख जिल्ला अधिकारी विपिन आचार्य, जिल्ला प्रहरी कार्यालय बाँकेका प्रमुख (एसपी) सन्तोषसिंह राठौंर, नेपाली काँग्रेस बाँकेका उपसभापति गोपालप्रसाद अधिकारी र सचिव सुधान्सु कोइराला, मुस्लिम संघका केन्द्रीय सदस्यहरु मेराज हल्वाई, जी नुरैन मुल्तमिस (साहिल) र मेराज अहमद खाँ, मुस्लिम समुदायका अगुवा रहमान मिया, कादिर अन्सारी लगायतको उपस्थिती रहेको थियो ।
नेपाल मुस्लिम संघ बाँकेले आयोजना गरेको उक्त कार्यक्रममा संघका जिल्ला सभापति सुफियान खान(पठान) ले सम्मान ब्यक्त गरेका थिए ।
Discussion about this post