बाँके कात्तिक ३ गते ।
नेपालगन्ज नाका भएर भारतबाट फर्किने नेपालीको संख्या घटेको छ । गत वर्षको दसैँभन्दा यस वर्ष भारतबाट आउने नेपालीको संख्या घटेको इलाका प्रहरी कार्यालय जमुनाहका इन्चार्ज बरिष्ठ प्रहरी नायव निरीक्षक मिनबहादुर विष्टले बताए ।
उनले घटस्थापनादेखि छैठौँ दिनसम्म करिव ९० हजार नेपाली घर फर्किएको बताए । गत वर्ष दसैँमा करिव डेढ लाख नेपाली घर फर्किएका थिए । ‘दसैँ मनाउने आउने नेपालीको संख्या गत वर्षभन्दा यस वर्ष एकदमै कम छ,’ उनले भने ।
अघिल्लो वर्षको दसैँमा दैनिक कम्तिमा २० हजार नेपाली नेपालगन्ज नाका भएर आउँथे । यस वर्ष दैनिक १०–१५ हजार नेपाली फर्किने गरेको वरिष्ठ सई विष्टले जानकारी दिए ।
आर्थिक मन्दीका कारण नेपालीहरु दसैँ मनाउन घर नआएको अनुमान गरिएको छ । ‘देशमा शान्ति छ, तर पनि दसैँ मनाउन आउने नेपालीको संख्या एकदमै न्यून छ,’ उनले भने, ‘किन कम आए त्यो त त्यसै भन्न सकिने अवस्था छैन, तर सवैतिर आर्थिक संकट छ । त्यसको मार दसैँमा पनि परेको हुनु पर्छ ।’
Discussion about this post