उपप्रधानमन्त्री खड्का भूकम्पका घाइतेको अवस्था बुझ्न भेरी अस्पतालमा

बाँके कात्तिक १९ गते ।
उपप्रधान एवं रक्षा मन्त्री पूर्णबहादुर खड्काले भेरी अस्पतालमा उपचाररत भूकम्पका घाइतेहरूलाई भेटेका छन् । आईतबार अपराह्न भेरी अस्पताल पुगेका उपप्रधानमन्त्री खड्काले जाजरकोट भूकम्पका घाइतेहरूको अवस्था बुझेका हुन् ।

उनले घाइतेहरूको शीघ्र स्वास्थ्य लाभको कामना गर्दै भेरी अस्पताललाई भूकम्पका घाइतेहरूको उपचारमा कुनै कमी हुन नदिन निर्देशन दिए । सरकारले घाइतेहरूको नि:शुल्क औषधि गर्ने जानकारी गराउँदै उनले उपचार, प्रतिकार्य र राहतमा तदारुकताका साथ काम गरिरहेको बताए ।

उपप्रधानमन्त्री खड्कालाई बाँकेका प्रमुख जिल्ला अधिकारी श्रवणकुमार पोखरेलले बाँकेका अस्पतालहरूमा भइरहेको भूकम्प प्रभावित घाइतेहरूको उपचार, उद्धार र राहतका लागि भएका कामहरूको बारेमा जानकारी गराएका थिए ।

भेरी अस्पतालका प्रमुख मेडिकल सुपरिटेन्डेन्ट डा। पवनजंग रायमाझीले अस्पतालमा उपचाररत घाइतेहरूको अवस्थाबारे जानकारी गराउनुभएको थियो । सरकारले भूकम्प प्रभावित जिल्लाहरूका घाइतेको उपचारका लागि भेरी अस्पताललाई “डेडिकेटेड अस्पताल” तोकेको छ ।