बाँके पुस १९ गते ।
होटल सिद्धार्थ भ्युबाट अंग्रजी नयाँ वर्ष मनाएर फर्किदै गरेका पैदलयात्रीलाई ठक्कर दिने स्कारपियो चालकलाई प्रहरीले संरक्षण गरेको भन्दै आफन्तले आज नेपालगन्ज–कोहलपुर सडक अवरुद्ध गरेका छन् । मृतकका आफन्त र सर्वसाधारण दुर्घटना भएको स्थान डोको कटेज नजिक भेला भएर सडक अवरुद्ध गरेका हुन् ।
गाडी चालक र गाडीमा सवार ब्यक्तिको बारेमा अनुसन्धान गरि कारवाही गर्ने प्रहरीले प्रतिवद्धता जनाएपछि सडक सुचारु भएको बाँके प्रहरीले जनाएको छ । मृतकका आफन्तले सडकमा टायर बालेर प्रहरी, प्रशासनले पिडकको संरक्षण गरेको भन्दै कारवाहीको माग गरेका थिए । ‘गाडी चालक र सवार महिलालाई कानून बमोजिम कारवाही गर्ने प्रहरीको प्रतिवद्धता पछि सडक सुचारु हुन दिएका छौँ,’ आन्दोलनमा सहभागी मोहित शाहले भने, ‘प्रतिवद्धता अनुसार कारवाही नभए सशक्त आन्दोलनमा उत्रिन्छौँ ।’
पीडितको आन्दोलनलाई सम्बोधन गर्न बाँकेका प्रहरी प्रवक्ता डिएसपी नारायण डाँगी नेतृत्वको प्रहरी टोली आन्दोलनस्थलमा पुगेको थियो । गाडी चालकलाई कानुन बमोजिम कारवाही गर्न बाँके प्रहरी तयार छ । कानुनभन्दा माथि कोहि पनि हुन सक्दैन । कानुन बमोजिम कारवाही हुन्छ,’ उनले भने ।
सडक दुर्घटनामा दुई जनाको मृत्यु भएको छ । रातको १२ः३० बजेको समयमा नेपालगंजबाट कोहलपुतर्फ जाँदै गरेको सु. प. प्र. ०१–००१– च ३४६४ नम्बरको स्करपियोले ठक्कर दिंदा सडक छेउमा उभिएका नेपालगंज उप–महानगरपालिका १३ की २४ वर्षीया आस्था शाह र राजापुर नगरपालिका १०, बर्दियाका २३ वर्षीय मायाराम चौधरीको घटना स्थलमा मृत्यु भएको थियो । दुर्घटनामा नेपालगंज १३ की सहाना शाह घाइते भएकी थिइन् ।
Discussion about this post