बाँके माघ १६ गते ।
अवैध चोरीपैठारी नियन्त्रणका लागि नेपाल–भारत सीमानाकामा सशस्त्र प्रहरी खटिएका छन् । अवैध चोरीपैठारी नियन्त्रण गर्न खटिएको सशस्त्र प्रहरीले चोरीपैठारी नियन्त्रण गर्न नसकेपछि पछिल्लो समय भारतबाट सामान ल्याउनेमाथि हातपातमा उत्रिएको छ । सोमवार बेलुकी जमुनाह भन्सार नाकामा खटिएका सशस्त्र प्रहरीले दादागिरी शैलीमा सर्वसाधारणमाथि हातपात गरेपछि चर्को आलोचना भएको छ ।
चेकजाँचका नाममा सशस्त्र प्रहरीले आम नागरिकलाई सताउने मात्र नभई हातपात गरेर संगठनको गरिमामाथि आँच पुर्याएका छन् । सोमवार सशस्त्र प्रहरीका पुरुषले भारतबाट सामान ल्याउँदै गरेकी महिलामाथि हातपात गरेर आफ्नो दादागिरी प्रस्तुत गरे ।
आफूले घरायसी प्रयोजनका लागि सामान ल्याइरहेको भन्दाभन्दै आफूलाई कुटपिट गरेको ति महिलाले बताइन् । ‘घरायसी सामान हो भन्दाभन्दै जमुनाहमा खटिएका सशस्त्र प्रहरीले मुका प्रहार गरे,’ उनले भनिन् ।
महिलालाई कुटपिट गरेको भिडियो सार्वजनिक हुँदासमेत जिल्ला सुरक्षा समितिका अध्यक्ष समेत रहेका बाँकेका प्रमुख जिल्ला अधिकारी श्रवणकुमार पोखरेलले कुनै प्रतिक्रिया दिएका छैनन् । जिल्लामा भएका हरेक गतिविधि फेसबुक पेज मार्फत सार्वजनिक गर्दै आएका उनी सशस्त्र प्रहरीले महिलालाई कुटपिट गरेको विषयमा मुख नखोल्नु दुर्भाग्य भएको सर्वसाधारणको भनाई छ ।
सोमवार नै सशस्त्र प्रहरीका घुमुवा असई सोमराज शर्माले पनि सामान ल्याउँदै गरेका महिलालाई बालेगाउँमा कुटपिट गरेको पीडित महिलाले बताए । ति महिलाका अनुसार, शर्माले सामान किन ल्याएको हो भन्दै सामान बोकेका महिलालाई लछार पछार गर्दै मुका प्रहार गरेको ति महिलाले बताए ।
ड्यूटीमा खटिएकका सशस्त्र प्रहरीले सशस्त्र प्रहरी वल वागेश्वरी गणका गणपति एसपी रमेश विक्रम शाहीको निर्देशनमा दादागिरी शैलीमा हातपातमा उत्रिने गरेको स्रोतले बताएको छ । ‘एसपी शाहीको निर्देशनमा ड्यूटीमा खटिएका सशस्त्र प्रहरीले सर्वसाधारण माथि हातपात गरेको बुझिन्छ,’ एक सर्वसाधारणले भने ।
चेकजाँचमा खटिने सशस्त्र प्रहरीले नागरिकलाई सास्ती दिँदै तस्कर र थोरै सामान ल्याउनेहरुसँग रकम असुली गर्दै आएका छन् । भन्सार कार्यालय र जमुनाहमा खटिएका सशस्त्र प्रहरीले भन्सार कार्यालयका प्रमुखलाई समेत दवावमा पारेका छन् । हैकमबादी शैलीमा उत्रिएका सशस्त्र प्रहरीको सामु भन्सार कार्यालयका प्रमुखसमेत निरिह बनेका छन् ।
असुली धन्दामा उत्रिएको सशस्त्र प्रहरीले सुरक्षाका निहुँमा नेपाल प्रहरीलाई काम गर्न असहज बनाएको छ । उसले नेपाल प्रहरीलाई हेपाहा दृष्टिले हेरेर भन्सार र जमुनाह नाकामा आफ्नो हैकम प्रस्तुत गर्दै आएको छ । ‘भन्सार प्रमुख र नेपाल प्रहरीलाई समेत हेप्ने सशस्त्रले सर्वसाधारणसँग कस्तो ब्यवहार गरिरहेको छ होला त्यो घाम झैँ छलंग छ,’ जमुनाह नाकामा भेटिएका एक सर्वसाधारणले भने ।
Discussion about this post