सरला सुवेदी
बाँके फागुन १० गते ।
बढ्दो सवारी दुर्घटना न्यूनीकरण गर्न बाँकेमा आजदेखि ट्राफिक सप्ताह सुरु भएको छ । सवारि चालकलाई हेल्मेट हस्तान्तरण गर्दै नियम सम्बन्धि स्टिकर टास गरि नेपाल सरकारका गृहमन्त्री एवम् उपप्रधानमन्त्री नारायणकाजी श्रेष्ठले उक्त सप्ताहको उद्घाटन गर्नुभएको हो।
उद्घाटन कार्यक्रममा बोल्दै गृहमन्त्री श्रेष्ठले आम सर्वसाधारणमा ट्राफिक सचेतना अभिवृद्धि गर्दै सडक अनुशासन कायम गर्नका लागि सबैलाई प्रेरित गर्न आवश्यक रहेको बताउनुभएको छ ।
यस्ता अभियानले सडक अनुशासन कायम गर्दै बढ्दो सवारी दुर्घटना न्यूनीकरणमा भूमिका खेल्ने र अभियानलाई सफल पार्न सबैलाई आह्वान गर्नुभयो । गृहमन्त्री श्रेष्ठले सवारी दुर्घटना न्यूनीकरणका लागि सबै पक्षको इमानदारिता र सक्रियता आवश्यक रहेको बताउनुभयो ।
सडक सुरक्षा र ट्राफिक नियमसम्बन्धी प्लेकार्डसहित र्यालीसमेत निकालिएको छ । यसले ट्राफिक सचेतना नागरिकसम्म पुर्याउन सहयोग पुग्ने अपेक्षा गरिएको जिल्ला ट्राफिक प्रहरी कार्यालय बाँकेका प्रमुख गोपीकृष्ण सुवेदीले जानकारी दिनुभयो । सडकको अवस्था, भौगोलिक कारण, सवारीसाधनको अवस्था, ट्राफिक नियमको उल्लंघन, मौसमलगायतका कुरामा ध्यान नदिँदा बढी दुर्घटना हुने गरेको छ । पैदलयात्री जथाभावी बाटो काट्ने, चौपाय छाड्ने जस्ता कुरा थप दुर्घटना बढेका कारण जनचेतना जगाउँदै दुर्घटना न्यूनीकरण गर्न ट्राफिक सप्ताह सुरु गरिएको ट्राफिक प्रहरीले जनाएको छ । 
यस्तै सप्ताहअन्तर्गत पैदलयात्रीलाई सडकपेटी तथा जेब्राक्रसबाट हिँड्न सिकाउने, सवारीसाधनको गतिकम गर्न प्रेरित गर्ने तथा जेब्राक्रसमा पैदल यात्रीलाई प्राथमिकता दिने, पार्किङ एवम् सडकपेटी व्यवस्थित गर्दै ट्राफिक सचेतनासम्बन्धी पर्चा र पम्प्लेट वितरण गर्ने, विद्यार्थीलाई ट्राफिक नियमको प्रशिक्षण दिनेलगायतका कार्यक्रम रहेको जिल्ला ट्राफिक प्रहरी कार्यालय बाँकेका प्रमुख सुवेदीले बताउनु भयो ।
कार्यक्रममा बाँके जिल्लामा आवद्ध विभिन्न संघसस्था, एन प्याब्सन प्याब्सनमा आवद्द स्कुलका विद्यार्थीहरुले ट्राफिक नियम सम्बन्धिका प्लेकार्ड सहित र्यालिमा सहभागि भएका थिएभने कार्यक्रममा सडक नाटक समेत प्रस्तुत गरिएको थियो।
Discussion about this post