बाँके साउन १६ गते ।
नेपालगन्ज उपमहानगरपालिका–१६ जयसपुरमा पुनः लागु औषध प्रयोगकर्ता तथा कारोवारीहरु सल्बलाउन थालेका छन् । तत्कालीन बाँकेका प्रहरी प्रमुख एसपी विक्रमसिंह थापाले जयसपुरमा हुँदै आएको लागु औषध कारोवार र प्रयोगलाई नियन्त्रणमा ल्याएका थिए ।
उनका पालामा समातिएका कारोवारीहरु सजाय काटेर छुटेसँगै फेरी जयसपुरमा लागु औषधको कारोवार र प्रयोग बढ्न थालेको स्थानीय बताउँछन् । करिव एक दशकसम्म शान्तसँग बस्न पाएका स्थानीयहरु पुनः लागु औषधको प्रयोग र कारोवार बढ्न थालेपछि स्थानीयहरु त्रसित हुन थालेका छन् । स्थानीय प्रहरीको पनि उपस्थिति छ । लागु औषध नियन्त्रण व्यूरोको टोलि पनि परिचालित छ ।
तर पनि लागु औषध कारोवार भइरहेको स्थानीय बताउँछन् । ‘हिंजोआज त पहिलेकै जस्तै कारोवारी र प्रयोगकर्ताहरु जसयपुर आउन थालेका छन् एक जना स्थानीयले भने–‘स्थानीय प्रहरी र लागु औषध नियन्त्रण व्यूरोको टिमनै मिलेको जस्तो अनुभव हुन थालेको छ ।’ मध्यराती वाइक र स्कुटरमा युवायुवतीहरु लागु औषध किन्न र प्रयोग गर्न आउने गरेको उनले सुनाए । ‘१२–१ बजे राती वाइक र स्कुटरमा युवा युवति आउँछन् उनले भने–‘राती घरआगन छेउबाट वाइक स्कुटर ओहोरदोहोर गर्दा बालबच्चा र महिलाहरु त्रसित हुने गरेका छन् ।’ अपरिचित व्यक्तिको ओहोरदोहोरले स्थानीयहरु असुरक्षित भएको बताउँछन् ।
यहाँसम्म की लागु औषध कारोवारीहरु जयसपुर प्रवेश गर्दा सडकका वत्तिहरु पनि निभाउने गरिएको छ । जसका कारण लागु औषध कारोवारमा स्थानीय प्रहरी र व्यूरोका प्रहरीहरुको समेत मिलेमत्तो हुन सक्ने आशंका स्थानीयको छ । ‘रातारात वाइक र स्कुटरहरु ओहोरदोहोर गर्दा प्रहरीले के हेरेर बस्छन् अर्का स्थानीय प्रश्न गर्दै भन्छन्–‘कतै प्रहरीकै संलग्नतामा त यो भइरहेको छैन ?’ जयसपुर जस्तै नेपालगन्ज उपमहानगरपालिका–१४ स्थित उधौपुरवामा पनि लागु औषध कारोवारीका लागि प्रमुख केन्द्र बनेको छ । नेपालगन्जका लागु औषध कारोवारी तथा सेवनकर्ताहरु त्यहीँ पुग्ने छन् ।
कलिला उमेरका बालबालिकाहरु समेत दुव्र्यसनको लतमा फसेका छन् । कारोवारीहरुले प्रहरीसँगको सेटिङमा प्रतिबन्धित लागु औषधको कारोवार गरिरहेको शंका स्थानीयको छ । स्थानीयहरुलाई लागु औषध कारोवार गर्ने डिलरहरु राम्रोसँग थाह छ । प्रहरीले पनि पहिचान गरेको छ । आफु असुरक्षित हुने डरले स्थानीयबासीले हतपत भन्न सक्दैनन् । स्थानीय प्रहरीले देखेपनि नदेखे झै गर्ने गरेको स्थानीयबासीहरु गुनासो सुनाउँछन् ।
बाँकेका प्रहरी प्रमुख तुल बहादुर कार्कीले भने लागु औषध नियन्त्रणका लागि प्रहरीले सक्रियता देखाइरहेको बताउँछन् । उनले भने झै दैनिकरुपमा जमुनाह नाका आसपास क्षेत्रबाट भारतबाट लागु औषध ल्याउने कारोवारी र सेवनकर्ताहरु पक्राउ पनि परिरहेका छन् । उनले आफ्नो टोल, क्षेत्र र बस्तीमा लागु औषध कारोवार भइरहेकोबारे प्रहरीलाई जानकारी दिन आग्रह गर्छन् । ‘सबै ठाउँमा प्रहरीको उपस्थिति नहुन सक्दछ उनी भन्छन्–‘स्थानीयले पनि सहयोग गर्नुपर्छ ।
प्रहरीलाई सूचना दिनुहोस् कारोवारीहरु भाग्न पाउँदैनन् । हाम्रो कामै लागु औषध नियन्त्रण गर्ने र अपराधमुक्त समाज बनाउने हो ।’ लागु औषध नियन्त्रणका लागि सचेतनामुलक कार्यक्रमहरु संचालन भइरहेको पनि बताए । ‘हामीले लागु औषध दुव्र्यसनको बारेमा सचेतना फैलाउने कामलाई पनि अगाडि बढाएका छौं उनले भने–‘कारोवारीहरुलाई नियन्त्रणमा पनि लिइरहेका छौं ।’ भारतीय खुला सीमानाका कारण बाँकेमा लागु औषध नियन्त्रण गर्न चुनौतिपूर्ण बनेको छ ।
Discussion about this post