भारी बर्षाको असरः नेपालगन्जका अधिकांश स्थान जलमग्न

बाँके असार १६ गते ।
नेपालगन्जका अधिकांश भागहरु जलमग्न भएको छ । बुधबार बिहानैदेखि निरन्तर परेको वर्षाले विभिन्न ठाउँका सयौं घर, कार्यालय र पसलमा पानी पसेर सामानमा क्षति पुगेको छ।

वर्षाले नेपालगन्ज उपमहानगरका अधिकांश भागमा पानी जमेपछि दर्जनौँ घरमा पानी पसेर डुबान भएको स्थानीयले पीडा सुनाएका छन् । नगरको ईदगाह रोड, घरबारी टोल, न्यूरोडको सेतुविक चोकदेखि त्रिवेणी मोडसम्मको क्षेत्र, गणेशपुरको बस्ती, बसपार्क क्षेत्र, धम्बोझी, एकलैनी टोल, बिपी चोक, गुरुद्वारा रोड, बिलासपुर, कोरियनपुर र भृकुटीनगर तथा वडा ५, २०, १४, २२ र २३ का धेरै क्षेत्रमा पानी भरिएर ती क्षेत्रहरु जलमग्न भएका छन् ।

इदगाहरोड, घरबारी टोल, न्यूरोड र एकलैनीका अधिकांश पसल र घरमा समेत पानी पसेको स्थानीय बासिन्दाले जनाएका छन् । अत्यधिक बर्षाले धेरैको घर र पसलमा पानी पसेर बेहाल बनाएको छ । यस्तै, सुर्खेतरोड, न्यूरोड र अन्य स्थानमा पानी जमेर डुबान भएको स्थानीयको भनाइ छ । उपमहानगरका अधिकांश ठाउँमा पानी भरिएर जलमग्न भएपछि स्थानीयलाई आवागमनमा कठिन भएको छ । धेरै वडाको सडकमा आवागमनमा समस्या भएको न्यूरोडका अगुवा कृष्णप्रसाद श्रेष्ठले बताए ।

विशेष गरि नेपालगन्ज उपमहानगरपालिकाको वडा नम्बर ५ बर्षाले बढी प्रभावित भएको छ । पानीको सहज निकास गराउन स्थानीय जनप्रतिनिधिले प्रभावकारी भूमिका निर्वाह नगरेको स्थानीयले गुनासो सुनाएका छन् । यसअघिको बर्षाले पनि त्यो क्षेत्र प्रभावित भएको थियो । त्यतिबेला वडा प्रहरी कार्यालयको टोलिले शब्जीमण्डिसम्म नाला सफाइ गरेको थियो । बुधबारको बर्षापछि वडा प्रहरी कार्यालय पनि डुवानमा छ । नेपालगन्ज उपमहानगरपालिकाले पानी निकासको व्यवस्था गरिएको र नालाहरु पनि सफा गरिएको दाबी गर्दै ठुलो वर्षा भएकाले पानी निकासमा समस्या भएको बताए ।