बाँके असार २३ गते ।
तीन दिन देखि निरन्तरको झरी छ । नेपालगन्जका विभिन्न स्थान जलमग्न छन् । अघिल्ला वर्षजस्तो नेपालगन्ज उपमहानगरपालिका डुवानमा छैन । तर वडा प्रहरी कार्यालय क्षेत्रमा भने डुवान देखिएको छ ।
डिएसपी रोडदेखि एमपी स्कुल, रानीतलाउ र तरकारी मण्डीलगायतका केही स्थानमा नाला सफाइ नहुँदा पानी वग्न नपाएर जलमग्न अवस्थामा भयो ।
वडा प्रहरी कार्यालय क्षेत्र परिसरमा पनि पानी जम्यो । नाला सफाई नहुँदा पानी जमेपछि केहीबेर हिडडुलमै समस्या भयो ।
वडा प्रहरी कार्यालयका प्रहरी निरीक्षक हरिबहादुर विसीको नेतृत्वमा प्रहरीको टोलिले नाला सफाई गरेको छ ।
डिएसपीरोडदेखि तरकारी मण्डीसम्मको नाला सफाई गरिएको वडा प्रहरी कार्यालयका इन्चार्ज समेत रहेका प्रहरी निरीक्षक विसीले बताए । उनका अनुसार अहिले अवस्था सामान्य छ । पानीको सहज निकास भएपछि अहिले डुवानको अवस्था नभएको उनले बताए ।
नगरका अन्य क्षेत्रमा पनि यो वर्ष खासै डुवानको समस्या नदेखिएको नेपालगन्ज उपमहानगरपालिकाले जनाएको छ । बर्खाअगावै ढल र पानीको सहज निकासका लागि नाला खुलाउने काम भएकाले डुवानको समस्या नरहेको नगर प्रमुख प्रशान्त विष्टले बताए । उनका अनुसार विपद् पूर्वका कार्यक्रमलाई प्रभावकारी ढंगबाट अघि बढाइएको जानकारी दिए ।
Discussion about this post