बाँके भदौ ११ गते ।
जनता समाजवादी पार्टी नेपाल (जसपा) को सचिवमा बाँकेका कमरुद्धिन राई चयन भएका छन् । जसपा नेपालले विधान बमोजिम पदाधिकारीसहित कार्यकारिणी समिति, केन्द्रीय समिति तथा केन्द्रीय निकायका सदस्यहरू चयन गरेको विवरण सार्वजनिक गरेको छ ।
पार्टी अध्यक्ष उपेन्द्र यादवले ३० जनालाई पदाधिकारी चयन गरेकोमा बाँकेबाट राई सचिवमा चयन भएका हुन् । उनले केन्द्रीय समिति सदस्य २७, केन्द्रीय अनुशासन आयोग ६, केन्द्रीय लेखा परीक्षण आयोग ५ र केन्द्रीय निर्वाचन आयोगमा ५ जना सदस्य चयन गरेका छन् ।
गत जेठ २८, २९ र ३० गते जनकपुरमा पार्टीको महाधिवेशन गरेको जसपा नेपालले महाधिवेशनबाट अध्यक्ष उपेन्द्र यादवलाई अध्यक्षमा निर्वाचित गरेको थियो । उक्त महाधिवेशनले अन्य पदाधिकारी छनोट गर्ने अधिकार अध्यक्षलाई प्रत्यायोजन गरेको थियो । सोही अधिकार प्रयोग गरि यादवले पदाधिकारीसहित केन्द्रिय सदस्य र अन्य विभागको जिम्मेवारी तोकेका हुन् ।
उनले सह–अध्यक्षमा रकम चेम्जोङ र राजकिशोर यादव, मिर्गेन्द्रकुमार सिंह यादव, गोविन्द चौधरी, शिवलाल थापा मगर, विद्युत् बज्राचार्यलाई उपाध्यक्षको जिम्मेवारी दिएका छन् ।
लालबाबु राउत र रामकुमार शर्माले महासचिवको जिम्मेवारी पाउँदा मनिषकुमार सुमनलाई प्रवक्ताको जिम्मेवारी दिइएको छ ।
उपमहासचिवको जिम्मेवारी दीपक कार्की र रेखा यादवले पाएका छन् भने सचिवमा कमरुद्धिन राई, लिला सिटौला, शैलेन्द्र साह, सुनी लामा, राजकुमार राई, सुरेश मण्डल र लाक्पा शेर्पा चयन भएका छन् ।
Discussion about this post