बाँके चैत २५ गते ।
बाँकेको डुडुवा गाउँपालिकाले वडा नं. १ र २ अन्तर्गत पर्ने रामनगर–पाझा क्षेत्रलाई पर्यटन गन्तव्यका रूपमा विकास गर्ने पहल थालेको छ। गाउँपालिकाले उक्त क्षेत्रलाई धार्मिक तथा पर्यापर्यटन केन्द्रका रूपमा स्थापित गर्ने लक्ष्यसहित विभिन्न पूर्वाधार निर्माणका योजना अघि सारेको जनाएको छ।
गाउँपालिका अध्यक्ष नरेन्द्रकुमार चौधरीका अनुसार सो क्षेत्रमा ‘स्टेचु अफ शिव’, कृषि विद्यालय, पार्क लगायतका संरचना निर्माण गर्ने तयारी गरिएको छ। दुर्गम तथा बाढी प्रभावित क्षेत्रलाई नयाँ पहिचान दिने उद्देश्यले पर्यटनमैत्री विकासको अवधारणा अघि बढाइएको उनले बताए।
यसैक्रममा कृषि शिक्षा प्रवद्र्धनका लागि चारकोठे भवन निर्माण कार्य सुरु गरिएको छ। केही दिनअघि अध्यक्ष चौधरीले उक्त भवनको शिलान्यास गरेका हुन्। पशुपति माध्यमिक विद्यालय अन्तर्गत सञ्चालन हुने गरी कृषि विषयको अध्ययन–अध्यापनका लागि भवन निर्माण गर्न लागिएको जानकारी दिइएको छ।
गाउँपालिकाका प्राविधिक शाखा प्रमुख इन्जिनियर शुरेन्द्र वर्मा का अनुसार करिब ७० लाख रुपैयाँको लागतमा निर्माण सुरु गरिएको उक्त भवन आगामी असार मसान्तसम्म सम्पन्न गर्ने लक्ष्य राखिएको छ।
स्थानीय तहको यो पहलले शिक्षा, पर्यटन र स्थानीय अर्थतन्त्रलाई एकैसाथ मजबुत बनाउने अपेक्षा गरिएको छ।
Discussion about this post