बाँके फागुन ७ गते ।
मुस्लिम समुदायको महान पर्व रमजान बिहीबारदेखि बाँकेमा पनि सुरु भएको छ। एक महिनासम्म उपवास (रोजा) बसेर विविध धार्मिक तथा सामाजिक कार्यक्रमका साथ रमजान मनाइने परम्परा रहेको छ।
बुधबार मध्यरातमा नेपालगन्जस्थित जामा मस्जिद बाट मुख्य धर्मगुरु मौलाना मुफ्ती जाफर रजाले रमजानको चन्द्रमा देखिएको घोषणा गरेपछि बिहीबारदेखि रमजान महिना प्रारम्भ भएको हो। उनले चन्द्रमा देखिएकाले एक महिनासम्म रोजा बसेर धार्मिक तथा सामाजिक कार्यमा सहभागी हुन मुस्लिम समुदायलाई आग्रह गरेका छन्।
रमजान इस्लाम धर्मावलम्बीहरूको पवित्र र महत्त्वपूर्ण महिना मानिन्छ। बुधबारदेखि नै बाँकेका विभिन्न मस्जिदहरूमा तरावी नमाज सुरु गरिएको जामा मस्जिद सञ्चालक समितिले जनाएको छ।
रमजानको अवसरमा जिल्लाका विभिन्न संघसंस्था तथा स्थानीय तहका प्रमुखहरूले शुभकामना व्यक्त गरेका छन्। दारुल उलुम बरकातिया का संस्थापक तथा धर्मगुरु मौलाना अब्दुल जब्बार मन्जरीले रमजानले आपसी सहिष्णुता, आत्मीयता, धार्मिक तथा सांस्कृतिक सद्भाव र भातृत्व प्रवद्र्धन गर्ने विश्वास व्यक्त गरे।
यसैगरी, नरैनापुर गाउँपालिका का अध्यक्ष इस्तियाक अहमद शाह र जानकी गाउँपालिका का अध्यक्ष छब्बन खाँले पनि शुभकामना सन्देश जारी गर्दै संविधानले सबै धर्म, संस्कृति, भाषा र सम्प्रदायको समान अस्तित्व स्वीकार गरेको उल्लेख गरेका छन्। उनीहरूले रमजान पर्वले नेपालको धार्मिक विविधतालाई थप मजबुत बनाउने विश्वास व्यक्त गरेका छन्।
धर्मगुरु मन्जरीका अनुसार इस्लाम धर्मका पाँच अनिवार्य स्तम्भ—कलिमा, रोजा, नमाज, हज र जकात—मध्ये रोजा एक महत्त्वपूर्ण कर्तव्य हो। घाम उदाउनुभन्दा करिब डेढ घण्टा अघि सेहरी गरी सुरु गरिने रोजा सूर्यास्तपछि फलफूल तथा अन्य परिकार ग्रहण गरेर खोलिन्छ, जसलाई इफ्तार भनिन्छ।
रमजान महिनाभर मुस्लिम समुदायले दान, सद्भाव र सामाजिक सहकार्यका कार्यक्रम सञ्चालन गर्ने परम्परा छ। विभिन्न स्थानमा सामूहिक इफ्तार कार्यक्रमसमेत आयोजना गरिन्छ।
मुस्लिम अगुवा मेराज अहमद हल्वाई (हिमालय)का अनुसार ३० दिनको रोजा सम्पन्न भएपछि इद पर्व मनाइन्छ। इदका दिन पुरुषहरू इदगाहमा र महिलाहरू घरमै सामूहिक नमाज अदा गर्ने परम्परा रहेको छ। त्यसपछि एकअर्कालाई अँगालो हालेर ‘इद मुबारक’ भन्दै शुभकामना आदान–प्रदान गर्ने गरिन्छ। नयाँ लुगा लगाउने तथा विभिन्न परिकार तयार गरी वितरण गर्ने चलन पनि रहेको उनले बताए।
Discussion about this post