बाँके भदौ ६ गते ।
पूर्वमन्त्री तथा सांसद मोहम्मद इस्तियाक राईले नेपालगन्जलाई झिलीमिली पार्ने योजनाले सार्थकता पाइरहेको बताउनुभएको छ । नेपालगन्जको सीमा नाका जमुनाहा पिप्रहवामा हाइमास्ट जडानको शिलन्यास कार्यक्रममा बोल्दै उहाँले सो कुरा बताउनुभएको हो । उहाँले आफ्नो लक्ष्य नेपालगन्जलाई झिलिमीली बनाउने रहेको बताउनुभयो ।
उहाँले आफ्ना कार्यकर्ताहरुले संघ, प्रदेश र स्थानीय सरकारले गर्ने कार्यक्रमहरुको अनुगमन गर्न निर्देशन समेत दिनुभएको छ । नियम विपरीत काम गर्नेलाई कारवाही गरिनु पर्ने बताउनुभयो । अव हरेक विकास निर्माणका कामको अनुगमन हुनु पर्ने उहाँको भनाइ छ । पूर्वाधार विकास कार्यक्रमको खर्च हुन नसकेको डेढ करोड रकम नेपालगन्ज उपमहानगरपालिकाका कारण फ्रिज भएको आरोप लगाउनुभयो ।
कोभिडका लागि छुट्याइएको उक्त रकमबाट भेन्टिलेटर खरिद गर्नेगरी आफुले स्थानीय सरकारलाई लिखितरुपमा अख्तियारी दिएको उल्लेख गर्दै रकम फ्रिज हुनु दुर्भाग्यपूर्ण भएको उहाँको भनाइ छ । विकासका रकममा भएको राजनीतिमा खोजतलास गर्न कार्यकर्तालाई निर्देशन दिनुभयो ।
उहाँले पार्टीभन्दा माथि उठेर काम गर्न कार्यकर्तालाई निर्देशन दिनुभयो । नियम विपरीत भएका त्यस्ता विकास निर्माणका काम अवरुद्ध गरिने चेतावनी पूर्वमन्त्री राईले दिनुभयो । संघीय आयोजना कार्यान्वयन इकाइका निमित्त प्रमुख विजयकेशर खनालले हरेक वडामा कम्तीमा एक एक वटा पर्ने गरी नेपालगन्ज उपमहानगरपालिकाका ३९ स्थानमा हाइमास्ट जडान भइरहेको बताउनुभयो । स्थानहरु उपमहानगरपालिकाले छनोट गरेर दिएको हो ।
चोक र बस्ती भएको स्थानलाई लक्षित गरेर जडान हुँदैछन् । नेपालगन्जमा ३९ र कोहलपुरमा १३ वडा हाइमास्ट जडानका लागि आयोजनाले ६ करोड ४० लाख ३२ हजार २ सय ८२ रुपैयाँ बजेट रहेको जनाएको छ ।
Discussion about this post