बाँके चैत ३० गते ।
स्थानीय निर्वाचन नजिकिदै गर्दा निर्वाचन आयोगले जारी गरेको निर्वाचन आचारसंहिता उल्लंघन हुन थालेको छ । त्यो पनि जनप्रतिनिधिबाटै ।
लुम्बिनी प्रदेशका केही नगर र गाउँपालिका प्रमुखहरुले गाडी फिर्ता गरेका छन् । तर बाँके र बर्दियाका जनप्रतिनिधिहरुले आचारसंहितको बेवास्ता गर्दै पालिकाकै सरकारी गाडीलाई सुविधकारुपमा प्रयोग गरिरहेका छन् ।
उनीहरु पार्टीका कार्यक्रममा आउजाउ गर्दा पनि सरकारी गाडीकै प्रयोग गर्दै आएका छन् । स्थानीय सरकार प्रमुख र उपप्रमुखहरुले महँगो चार पाग्रे गाडी तथा वडाध्यक्षहरुले मोटर साईकल प्रयोग गरिरहेका छन् ।
गाडीमा प्रयोग हुने इन्धन पनि कार्यालयबाटै लिन गरेको पाइएको छ ।
बाँकेको नेपालगन्ज उपमहानगरपालिका, कोहलपुर नगरपालिका र बैजनाथ, जानकी, खजुरा, डुडुवा, नरैनापुर र राप्ती सोनारी गाउँपालिकाका जनप्रतिनिधिहरुले पहिलो स्थानीय तहको निर्वाचनमा जितेपछि महंगो सरकारी सवारी साधन खरिद गरेका छन् ।
त्यस्तै, बर्दियाको गुलरिया, बाँसगढी, राजापुर, बारबर्दिया, ठाकुरबाबा, मधुवन नगरपालिका र बढैयाताल र गेरुवा गाउँपालिकाले प्रमुख उपप्रमुखका लागि चार पांग्रे गाडी र वडाध्यक्षका लागि मोटरसाईकल खरिद गरेका थिए ।
ति सरकारी साधन हालसम्म जनप्रतिनिधिहरुले नै प्रयोग गरिरहेका छन् । तर, जनप्रतिनिधिहरुले भने आफूहरु उम्मेदवार नभइसकेको अवस्था र अझै पनि आफ्नो कार्यकाल केही दिन बाँकी रहेकाले सरकारी सवारी साधन प्रयोग गरिरहेको दाबी गरेका छन् ।
पालिका प्रशासनले भने जनप्रतिनिधिहरुले सरकारी गाडी बुझाएको रेकर्ड नरहेको जनाएका छन् ।
निर्वाचन आयोगले आचार संहितामा जनप्रतिनिधिहरुले उम्मेदवारी दिंदा सरकारी सुविधा प्रयोग गरेको पाइए उम्मेदवारी नै खारेज गर्न सक्ने व्यवस्था मिलाएको छ ।
Discussion about this post