बाँके पुस १० गते ।
छाडा पशु चौपाया ब्यबस्थापनका लागि नेपालगन्ज उपमहानगरपालिका र राप्तीसोनारी गाउँपालिकाबीच समन्वय र सहकार्य गरेर अगाडि बढिने भएको छ ।
अव्यवस्थित छाडा पशु चौपायालाई ब्यबस्थित कसरी गर्न सकिन्छ भन्ने बारेमा दुई पालिका बीच समन्वय र सहकार्य गरेर अगाडि बढने कुरामा छ्लफल सुरु भएको नेपालगन्जका प्रमुख प्रशान्त बिष्टले जानकारी दिनुभयो ।
नेपालगन्जको छाडा पशु चौपायाको ब्यबस्थापन र संरक्षणका लागि राप्तिसोनारी गाउँपालिकासँग सहकार्य गर्न आवश्यक ठानेका छौं बिष्टले भन्नुभयो–यहाँ जंगल पनि प्रसस्त भएकाले आहारको समस्या पनि कम होला । छाडा पशु चौपायाका कारण नेपालगन्ज नगरमा सवारी दुर्घटना तथा गाउँमा किसानको बालिनालीमा नोक्सान पुग्दै आएको छ ।
नेपालगन्ज उपमहानगरपालिकाले कान्जिहाउस पनि संचालन गरेको छ । तर कान्जिहाउसमा राखिएका छाडा पशु चौपायालाई खुवाउने आहाराको भने बेलाबेला अभाव हुने गरेको छ । राप्तीसोनारी गाउँपालिकाले पनि छाडा पशु चौपाया समस्याको रुपमा रहेको जनाएको छ ।
गाउँपालिकाका अध्यक्ष तप्त पौडेलले नेपालगन्ज जस्तै राप्तीसोनारीमा पनि छाडा पशु चौपायाको समस्या रहेकाले यो समस्याको हल सबै पालिका मिलेर गर्नु पर्ने बताउनु भयो । उहाँले राप्तीसोनारीमा ५ वटा कान्जिहाउस संचालनमा रहेको पनि बताउनु भयो ।
नेपालगञ्ज उपमहानगरपालिकाका प्रमुख बिष्टको नेतृत्वमा वडा अध्यक्षहरु गोपाल पुन, गोबिन्द रेग्मी, तरुण बज्राचार्य, कार्यपालिका सदस्य बसन्त कनौजिया, नगरपालिकाका वातावरण इन्जिनियर प्रकाश डिसी, कर्मचारी लगायतको टोली आज राप्तीसोनारी पुगेको थियो ।
Discussion about this post