बाँके असोज १६ गते ।
जिल्ला प्रशासन कार्यालय बाँकेले नेपालगन्जमा कफ्र्यु आदेश जारी गरेको छ । अर्को सूचना जारी नभएसम्म अनिश्चितकालिन कफ्र्यु जारी गरिएको हो ।
धार्मिक सदभावको सहरका रुपमा परिचित नेपालगन्जमा विगत दुई दिनदेखि तनाव सिर्जना भइरहेको छ । नेपालगन्ज आज बन्दछ । सहरमा नारावाजी भइरहेको छ । सदभाव कायम राख्न र्याली प्रदर्शन गरिएको छ । मोहम्मद डेको दिन एक जना स्थानीय व्यक्तिले सामाजिक संजालमा इस्लाम धर्मलाई लक्षित गरेर अभिव्यक्ति दिएपछि नेपालगन्ज अशान्त बन्दै आएको छ ।
उक्त अभिव्यक्तिले इस्लाम धर्ममा आस्था राख्नेहरुलाई चोट पुराएको भन्दै दुई दिन अघि नेपालगन्जमा टाएर बालेर उनीहरुले जिल्ला प्रशासनमा नारावाजी गरेका थिए । त्यसको प्रतिवादमा आज हिन्दु धर्ममा आस्था राख्नेहरुले प्रर्दशन गरेपछि नेपालगन्ज थप अशान्त बनेको हो । पसलहरु सबै बन्द छन् ।
विद्यालय पनि खुलेका छैनन् । स्थितिलाई सहज बनाउन सम्बद्ध सरोकारवालाहरु लागि परेका छन् । विहान धर्मगुरु सम्मेलित सदभाव र्याली प्रर्दशन गरिएको छ ।
धार्मिक सदभाव समितिका अगुवाईमा गरिएको प्रर्दशनमा धर्मगुरुहरू, राजनीतिक दल, स्थानीय जनप्रतिनिधि, नागरिक समाज, पेसाकर्मी, राष्ट्रसेवक कर्मचारीलगायतको सहभागीता रहेको थियो ।कुनै एक व्यक्तिले दिएको अभिव्यक्तिलाई लिएर धार्मिक सदभाव नै खलबलिने स्थिति आएपछि धर्मगुरुहरु सडकमा आएर सदभाव कायम राख्न अपिल गरेका छन् ।
सामाजिक सञ्जालमा धर्म, समुदाय विरुद्ध अभिव्यक्ति दिइएको भन्दै आइतबार नेपालगन्जमा एकाएक प्रदर्शन भएपछि त्यसको प्रतिक्रिया स्वरूप नेपालगन्जमा आज बन्दको आव्हान गरिएको हो । डेढ दशक अघि पनि नेपालगन्जमा धार्मिक द्धन्द्ध हुँदा ठूलो धनजनको क्षती भएको थियो ।
Discussion about this post