काठमाडौं असोज २२ गते ।
विराट कोहली र केएल राहुलको धैर्यपूर्ण ब्याटिङप्रेरित भारतले आईसीसी एकदिवसीय विश्वकपमा अस्ट्रेलियाविरुद्ध ६ विकेटको जित निकालेको छ ।
आइतबार चेन्नाईस्थित एमए चिदम्बरम रंगशालामा सम्पन्न खेलमा विराट र राहुलको जोडी जम्दा अस्ट्रेलियाले प्रस्तुत गरेको २०० रनको लक्ष्य भारतले ४२।२ ओभरमा चार विकेट गुमाएर पूरा ग¥यो । भारतबाट पाँचौँ नम्बरमा ब्याटिङका लागि आएका राहुलले अविजित ९७ रन बनाए । उनले ११५ बलमा आठ चौका र दुई छक्का प्रहार गरे ।
यस्तै, विराटले ११६ बलमा ६ चौकासहित ८५ रन बनाए । स्कोरबोर्ड २–३ को नाजुक अवस्था रहँदा यी दुईले चौथो विकेटका लागि १६५ रनको साझेदारी गर्दै भारतलाई जितउन्मुख गराएका थिए । हार्दिक पन्ड्या १५ रनमा अविजित रहे । भारतका कप्तान रोहित शर्मा, इशान किशन र श्रेयस ऐयर शून्यमा पभेलियन फर्किएका थिए ।
अस्ट्रेलियाका जस हेजलउडले तीन विकेट लिए । मिचेल स्टार्कले एक विकेट हात पारे । टस जितेर ब्याटिङमा आएको अस्ट्रेलियाले ४९।३ ओभरमा सबै विकेट गुमाएर १९९ रनको योगफल खडा गरेको थियो । अस्ट्रेलियाका कुनै पनि ब्याटर भारतीय बलरसामु खुलेर खेल्न सकेनन् ।
अस्ट्रेलियाबाट स्टिभ स्मिथले ४६ र डेविड वार्नरले ४१ रन बनाए । यी दुईले दोस्रो विकेटका लागि ६९ रनको साझेदारी गर्दै अस्ट्रेलियाको इनिङ उकास्ने प्रयास गरेका थिए । यसबाहेक, अन्य कुनै पनि समयमा अस्ट्रेलियाले साझेदारी बनाउन सकेन । अस्ट्रेलियाका मार्नुस लाबुसचेन्जले २७ रन जोड्दा ग्लेन म्याक्सवेल र कप्तान प्याट कुमिन्सले समान १५ रन थपे ।
नवौँ नम्बरमा ब्याटिङका लागि आएका मिचेल स्टार्कले २८ रन बनाए । भारतका रविन्द्र जडेजाले तीन विकेट लिए । १० ओभर बलिङ गरेका जडेजाले एक मेडन राख्दै २८ रन खर्चिए । कुलदीप यादव र जसप्रित बुमराहले समान दुई विकेट लिए । रविचन्द्रन आश्विन, हार्दिक पन्ड्या र मोहम्मद सिराजले एक–एक विकेट हात पारे ।
अक्टोबर ५ देखि सुरु भएको प्रतियोगितामा दुवै टिमको यो पहिलो खेल हो । यो संस्करणमा १० टिमको सहभागिता छ । योपटक भारत, अस्ट्रेलियासँगै इंग्ल्यान्ड, न्युजिल्यान्ड, पाकिस्तान, अफगानिस्तान, बंगलादेश, श्रीलंका, दक्षिण अफ्रिका र नेदरल्यान्ड्सले प्रतिस्पर्धा गर्दै छन् ।
Discussion about this post